VOV4.Bahnar - Kơ sơ̆ 3/12, Khul jang đơ̆ng Anih tơm vei lăng jang pơ gang, Anih jang kơ Kuô̆k hô̆i păng Jơ nŭm vei lăng hơ drĕch kon kông kơ Kuô̆k hô̆i đei jơ bơ̆ jang tơ̆ dêh char Dak Lak găh tơ drong tang găn jĭ Covid-19 păng hơ len năng tơ drong ‘lơ̆ng mưh vă man Hnam pơ gang Đa khoa trung ương tơ̆ tơ ring Tây Nguyên. 

Kơ dră tơm vei lăng jang pơ gang pơ ma lơ̆m jơ bơ̆ jang

Pơ ma lơ̆m jơ bơ̆ jang, Kơ dră tơm vei lăng jang pơ gang akhan, Dak Lak hlôi đei lơ tơ drong adrin păng jang ‘lơ̆ng tơ drong tang găn jĭ Covid-19, dêh char chơ̆n jơ hngâm păng sek tơ lang tôch trŏ. Kiơ̆ đơ̆ng nŏh, tơ gŭm găn ƀiơ̆ bơ ngai lôch đơ̆ng jĭ Covid-19 tơ̆ Dak Lak, lăp dang 1/5 pơ têng hăm kơ sô̆ jô̆ păh lăp lơ̆m tĕh đak, dêh char rŏ năng gô tơ lĕch tơ drong sơ đơ̆ng ‘nao hrôih ƀiơ̆. 

Găh tơ drong jang vă man Hnam pơ gang Đa khoa Trung ương tơ ring Tây Nguyên, Kơ dră tơm vei lăng jang pơ gang ăn tơ băt, ưh kơ jô̆ Tây Nguyên dôm tơ ring nai đĭ đei hnam pơ gang gĭt kăl đơ̆ng Anih tơm bơih. Tây Nguyên ‘nŏh jĭ tơ ring jang tam mă pran ‘lơ̆ng găh jang pơ gang dơ̆ng, kơ na tơ drong man Hnam pơ gang trung ương âu tôch gĭt kăl.

Dơ̆ng: Tơ blơ̆