VOV4.Bahnar - Pơgê năr 15/4, tơ̆ Hà Nội, Dơnŏ anĭh tơm vei lăng Chŏh jang sa păng Atŏk tơ iung tơring tơrang pơgơ̆r hop akŏm tơlĕch jang Tơdrong vă jang atŏk kơtang kĕ jang hơnĭh bơ̆ jang vei lăng tơdrong jang pơgang vei lăng kon tơrong rim hơnĭh, jăl jang 2021-2030; pơma dơnŭh trong jang tang găn jĭ pơ ‘ngĕh akar tơ̆ kon tơrong. Tơdrong tơm kơ tơdrong vă jang au lơ̆m jăl jang 2021-2030 lăng trŭh jang kiơ̆ kơtang, hơmet pơ ‘lơ̆ng păng atŏk kơtang kĕ jang vei lăng hơnĭh jang pơgang vei lăng kon tơrong, sơđơ̆ng bơ̆ jang jơnei; vei lăng ‘lơ̆ng pơrang jĭ kon tơrong, vei lăng năng tông jơhngơ̆m jăn kon pơlei păng vang iung jang hơdoi lơ̆m apŭng plĕnh tĕh. Đei ƀơm trŭh tơdrong jang tang găn jĭ pơ ‘ngĕh akar tơ̆ kon tơrong, kiơ̆ đơ̆ng Hơnĭh jang pơgang vei lăng kon tơrong găh Dơnŏ anĭh tơm vei lăng Chŏh jang sa păng atŏk tơ iung tơring tơrang sơkơ̆t hơdăh, pơrang jĭ hơnơ̆ng pơrăm tơpŏh lang să tơ̆ lơ tơring.  Trŭh dang ei jĭ pơ ‘ngĕh akar tơ̆ kon tơrong hlôi đei ƀô̆h tơ̆ 149 apŭng găh 25 dêh char, pơlei tơm.

Tơblơ̆ nơ̆r: Amazưt