VOV4.Bahnar - ‘Năr 2/12, dêh char Lâm Đồng đei dơ̆ng 129 ‘nu jĭ Covid-19 ‘nao, hơ tŏk akŏp kơ sô̆ bơ ngai jĭ lơ̆m dêh char tŏk 3.623 ‘nu. Kơ sô̆ bơ ngai jĭ Covid-19 tơ̆ Lâm Đồng hlôi tŏk hloh 9 ‘măng pơ têng hăm khei ‘năr dêh char pơ tơm tơ mơ̆t yua dôm trong jang ăn chă yak vih vơ̆t lơ̆m tơ pôl. Vă tơ jur tơ drong hrăt hrot ăn rim hơ nih hơ met bơ ngai jĭ Covid-19, Anih vei lăng kon pơ lei dêh char Lâm Đồng tơ chơ̆t jang kiơ̆ trong tơ lĕch jang hơ met F0 tơ̆ hnam.

Vă tơ jur tơ drong hrăt hrot ăn rim hơ nih hơ met, Lâm Đồng bơ̆ jang kiơ̆ hơ met F0 tơ̆ hnam

Kiơ̆ kơ ‘noh, F0 hơ met tơ̆ hnam ‘noh bơ ngai jĭ Covid-19 ưh kơ đei tơ drong jĭ, dăh mă đei ƀôh jĭ păh ai; ưh kơ đei ƀôh jĭ tơ soh dăh mă ưh kơ măh ô xy, păng bơ ngai hlôi ƀet 2 jrŭm dăh mă 1 jrŭm vắc xin Covid-19 đơ̆ng rŏng 14 năr... ‘Ngoăih kơ ‘noh, F0 hơ met tơ̆ hnam oei athei đei tôm tơ mam, kơ măy kơ mŏk ăn oei hơ drô̆ y tế.

Thuem: Tơ blơ̆