VOV4.Bahnar - Tơ̆ Hop akŏm tơbăt pơgơ̆r kơsơ̆ năr 3/10, tơ̆ Hà Nội, Kơ iĕng Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang Phùng Đức Tiến sơkơ̆t hơdăh, gô akŏm rim trong jang găh hơnĭh tĕch mơdro hơdrin iŏk đei 50 ti dolar đơ̆ng tĕch mơdro tơmam drăm chŏh jang sa păng ka hơdang tơ̆ tĕh đak đe lơ̆m sơnăm au. Hlŏh 9 khei, chŏh jang sa hơnơ̆ng vei kơ jăp hơyak tŏk ‘lơ̆ng hăm hơyak tŏk kơ rim tơmam drăm chŏh jang sa tĕch mơdro tơ̆ tĕh đak đe. Pơtêng hăm dôm khei au kơ sơnăm sơ̆, iŏk đei tĕch mơdro tơ̆ tĕh đak đe găh tơmam drăm chŏh jang sa păng ka hơdang kơ 9 khei tŏk 15,2%, ‘nŏh dang 40 ti 800 trĭu dolar Mi, tơmam drăm chŏh jang sa păng ‘long, ka hơdang jei tŏk. Trŭh dang ei hlôi đei 7 tơmam drăm tĕch mơdro tơmam drăm tơ̆ tĕh đak đe iŏk đei hlŏh 2 ti dolar Mi. Lăng trŭh trong tơlĕch ăn akŏp iŏk đei tĕch mơdro tơ̆ tĕh đak đe tơmam drăm chŏh jang sa ‘long ka hơdang đei 50 ti dolar Mi lơ̆m sơnăm au, lơ̆m dôm khei vă đĭ sơnăm, Dơnŏ anĭh tơm vei lăng Chŏh jang sa păng Atŏk tơ iung tơring tơrang gô hơnơ̆ng pơtrŭt kơtang hơmet ming hơnĭh jang, jang sa iŏk đei kơ jăp, ‘lơ̆ng, jơnei lơ̆m jang sa, pơm tơlĕch, tĕch mơdro, pơtho tơbăt, pơchŏh trong rim tơring mă kăl ‘nŏh tơring tơm jang phe ƀa, rong kon tơrong, ka hơdang đei trong pơ prŏ jang trŏ lăp hăm tơdrong ‘mĕh vă răt iŏk đơ̆ng hơnĭh mơdro sa.

VOV/Amazưt tơblơ̆ nơ̆r