VOV4.Bahnar – Teh đak bơ̆n hăm tơdrong hiôk găh tơmam choh pơtăm, lơ tơmam kăp gĭt kơ tơring tơrang... tŏk bŏk  jing minh tơdrong pran. Chŏng mă vă tĕch tơmam drăm âu gơh xơđơ̆ng, kơjăp noh pơkăl tơlĕch ăn kon pơlei jang mir, hơp tak xăh, anih jang mŭk drăm athei hơmet tôm hlôh vao tĕch tơlĕch tơmam drăm kiơ̆ trong ‘nao, trong tĕch răt điê̆nt ưh...

Tơmam choh pơtăm kơ Việt Nam đei lơ tơmam ‘lơ̆ng

Pơm jang, tĕch tơmam choh pơtăm ăn teh đak đe lơ̆m dôm xơnăm tơjê̆ âu hơnơ̆ng pơjing đei tơdrong jơnei ‘nao. Kiơ̆ kơ noh, khei năr âu ki, tơdrong mă đak xut Việt Nam tĕch ăn tơring EU, Mih; pơ ŏ Sơn La tĕch ăn dôm teh đak tơnap nhen Anh, Úc đei jơnei; sâu riêng Đăk Lăk tĕch ăn teh đak Trung Quốc, plei vaih Lục Ngạn, Bắc Giang đei hmach bơnê tơ̆ teh đak Nhâ̆t, Phlăng... ăn ƀôh dôm trong pơkăp hơtŏk hơnăn, tĕch tơlĕch păng kăp gĭt noh tơroi tơbăt ăn kon pơlei jang mir athei mă tơnăp.

Chŏng mă dôm tơdrong đei jơnei âu ưh đei nhen hăm tơdrong hơtŏk tơring tĕch răt kơjăp, kơlih tơdrong tơnap ăh tơrĕk hăm tơmam choh pơtăm, mă kăl noh dôm tơring kơyươ trong pơm jang oei tơjruh, tơnap kơ tĕch tơlĕch, kơyươ khei năr vei lăng kơđeh. Atŭm hăm noh, tơdrong tơrĕk tơmam choh pơtăm vă tĕch kiơ̆ điê̆n tưh ưh đei ƀônh ôh, kơlih tơdrong hlôh vao đơ̆ng anih jang mŭk drăm hăm trong tĕch răt âu oei tơjruh. Yă Đinh Tuyết Nhung, Kơdră Jơnŭm Hơp tak xăh choh jang xa pơm pơgang păng tơpôl Bắc Kạn ră hơdăh: “Tơmam choh pơtăm đei khei năr vei lăng kơđeh, păng anih jang duh tam mă đei um rŭp duh nhen trong tĕch răt vă đei minh trong jang hơdăh tơrĕk hăm tơmoi tĕch răt noh tĕch pơdro hăm tơmam drămd dei pơkăp lơ̆m anih tĕch răt tam mă kơjung. Nhôn hơpơi ‘moih đơ̆ng găh jơnŭm pơgơ̆r tơring gô đei dôm trong jang hơdăh vă tơgŭm ăn dôm anih jang mă gơh ‘nhăk tĕch tơmam tĕch tơlĕch lơ̆m tơring tih xă”.

Athei pơjing đei hơnăn ăn tơmam drăm choh pơtăm

Vă xơđơ̆ng tơring tĕch răt hăm dôm tơmam choh pơtăm, athei pơjing hơnăn ăn tơmam drăm, pơjing um rŭp anih jang mŭk drăm. Atŭm hăm noh tơrĕk lơ hloh truh trong jang ‘nao pơm tơlĕch tơmam drăm duh nhen đei trong pơkăp hơvơn anih jang mŭk drăm vă hơtŏk kơjă tơmam choh pơtăm.

        Tang măt ăn anih tĕch răt điê̆n tưh Postmart.vn – ƀok Nghiêm Tuấn Anh, Kŏng ti dơnơm Ƀưu điê̆n Việt Nam ăn tơbăt, kiơ̆ pơkăp jang logistics, tơdrong tĕch răt điê̆n tưh kơ Ƀưu điê̆n Việt Nam, hlôi đei lơ tơmam sâu riêng tĕch ăn teh đak Mih, plei vaih tĕch ăn teh đak Nhâ̆t, Châu Âu... Lơ̆m tơdrong hơtŏk tĕch pơdro điê̆n tưh, tơdrong hơmet tôm hlôh vao, iŏk yua trong jang ‘nao ăn bơngai jang mir noh kăp gĭt hloh: “Bơ̆n đei lơ hơdrĕch plei ‘long ‘lơ̆ng, tơnăp, gơh tĕch tơlĕch lơ̆m teh đak kơdih păng tĕch ăn teh đak đe. Dang ei bơngai jang mir tơ̆ tơring groi kông, tơring pơxĕl, kŏng ngê̆ thŏng tin tam mă đei hơtŏk hơtŏ hăm dôm dêh char, pơlei tơm kơdrâ̆m. Kơyươ noh, tơdrong hơmet tôm hlôh vao ăn bơngai jang mir, nhôn lăng noh jing tơdrong kăp gĭt hloh vă gơh đei jơnei ăn tĕch pơdro điê̆n tưh. Kơyuơ noh, nhôn ưh adrô̆ pơdơh tơ̆ anih pơtho ăn bơngai jang mir băt trong hơ ‘nhăk tơmam choh pơtăm tĕch kiơ̆ điê̆n tưh, ‘nhăk tơmam đe yĕt pơtăm đe mă oei hơmet tôm tơdrong hlôh vao vă pơm jang kiơ̆ trong ‘nao dang ei”.

VOV/ Lan pơre păng tơblơ\ nơ\r