VOV4.Bahnar - Dơnŏ anĭh Đảng dêh char Dak Lăk ‘nao iung jang hơdoi hăm Học viện Chính trị Quốc gia Hồ Chí Minh pơgơ̆r Hop akŏm khoa hŏk hăm hơnăn “Dêh char Dak Lăk akŏm atŏk tơ iung chŏh jang sa kiơ̆ trong ‘lơ̆ng, kơ jăp”.

Rup hop akŏm

Tơ̆ hop akŏm, rim bơngai khoa hŏk, kơdră chĕp pơgơ̆r đŏk tơbăt Nơ̆r ƀơ̆r pơma kơ dĭh hăm lơ tơdrong phara dĭh băl: Trong bơ̆ jang đơ̆ng Đảng, trong jang, khôi luơ̆t Tĕh đak găh atŏk tơ iung chŏh jang sa kiơ̆ trong ‘lơ̆ng, kơ jăp: Trong bơ̆ jang, tơdrong jang tơgŭm djru đơ̆ng dêh char Dak Lăk găh atŏk tơ iung chŏh jang sa kiơ̆ trong ‘lơ̆ng, kơ jăp; Jang kiơ̆ kmăi kmŏk sinh hŏk lơ̆m atŏk tơ iung chŏh jang sa lơ̆m dêh char Dak Lăk: Tơdrong rơvơn păng tơdrong long lơ̆m atŏk tơ iung chŏh jang sa dêh char Dak Lăk kiơ̆ trong ‘lơ̆ng, kơ jăp; Mĭnh ƀar tơdrong păng tơdrong jang kih thuơ̆t atŏk tơ iung chŏh jang sa kơ jăp ‘lơ̆ng kiơ̆ trong jang hơ iă ăn mĭnh ƀar ‘long pơtăm tơm tơ̆ Dak Lăk; Tơdrong ƀô̆h yan au păng trong vă jang atŏk tơ iung hơnĭh jang kmăi kmŏk ot ‘long tơ̆ dêh char Dak Lăk...

Kiơ̆ đơ̆ng Tiến sĩ Võ Văn Lợi, Kơdră Khŭl pơtho khoa Kinh tế, Học viện Chính trị khu vực 3, Dak Lăk hăm tơdrong rơvơn hlŏh 650.000 hecta tĕh chŏh jang sa, lơ̆m au đei hlŏh 300.000 hektar tĕh bazan jing ‘lơ̆ng, atŭm hăm tŏ ‘mi kial sơđơ̆ng, Dak Lăk gô ƀônh atŏk tơ iung chŏh jang sa kiơ̆ trong tơgoăt dĭh băl jang sa atŭm hăm tĕch mơdro tơmam drăm, akŏm groi tĕh vă atŏk tơ ung choh jang sa đei iŏk yua kơ jăp.“Bơ̆n kăl pơjing đei tơmam drăm măt ‘moi kiơ̆ rim trong jang hơdoi vă bơ̆n pơgĕnh iung jang đĭ đăng dôm tơdrong đei. ‘Moi kiơ̆ tơgoăt jang hơdoi, ‘moi kiơ̆ rim trong atŏk kăp gĭt vă kơ bơ̆n dă ƀiơ̆ hiong răm, sơđơ̆ng ‘lơ̆ng ăn tơdrong đei iŏk yua. Lăp veh ver kĕ rim tơdrong long ‘nŏh bơ̆n kăl tơgoăt jang hơdoi”.

Rim kơdră tang măt vang năm lăng hơdrơ̆r pơdă tơmam drăm chŏh jang sa kăl kơ dêh char Dak Lăk

Kiơ̆ đơ̆ng Dơnŏ anĭh Đảng dêh char Dak Lăk, atŏk tơ iung chŏh jang sa kiơ̆ trong ‘lơ̆ng, kơ jăp ‘nŏh mĭnh lơ̆m tơdrau tơdrong jang tơm vă atŏk tơ iung mŭk drăm kơ dêh char, đei chĭh tơmơ̆t lơ̆m Tơdrong tơchơ̆t Pơm lêh hop akŏm Đảng dêh char ‘măng mă XVII, jăl jang 2020-2025. Mă lei tơdrong jang tim mă hrơ̆p mĭnh ‘măng, tim mă hơvơn đei rim bơngai tơmơ̆t jên jang lơ̆m chŏh jang sa hăm kmăi kmŏk hơgei … tŏk bŏk jing tơdrong găn ga tơm pơm ăn chŏh jang sa tim mă atŏk tơ iung ƀlep hăm trong ‘mĕh vă.

        Đơ̆ng ƀô̆h yan au tơ̆ tơring, ƀok Nguyễn Quang Hà, Kơdră chĕp pơgơ̆r Dơnŏ anĭh vei lăng kon pơlei apŭng Ea Hlei akhan, rim trong tơhlăk tơhlĭn lơ̆m chŏh jang sa Dak Lăk hrei au ‘nŏh, iŏk đei đơ̆ng tơdrong pơprŏ vă jang. Kơ yuơ lơ lŏh, kăl lăng kơ jăp hlŏh dơ̆ng trŭh tơdrong pơprŏ chŏh jang sa hơdrol vă pơma trŭh trong iung jang anai:“Đơ̆ng ki hei, tơdrong plei ăl kơ jă re păng kon pơlei hơnơ̆ng drŭh kiơ̆ tơdrong tơmam drăm đe răt lơ ‘nŏh pơtăm ‘long pơtăm mă ‘nŏh. Tơdrong mă au hơnơ̆ng ƀô̆h kơ yuơ bơ̆n jang pơ prŏ ăn tim mă ‘lơ̆ng. Trong jang mă ĭnh tơlĕch ăn ‘nŏh bơ̆n kăl jang ‘lơ̆ng bơ̆ jang pơ prŏ ăn, hơmet ming pơ prŏ kiơ̆ tơring, trŏ lăp hăm kơ loăi ‘long pơtăm vă hơnhăk đei iŏk yua kơ jăp lơ̆m mĭnh hơgăt tĕh jang sa”.

        Tơ̆ Hop akŏm, ‘ngoăih rim nơ̆r tơgop lăng trŭh chŏh jang sa kơ jăp ‘lơ̆ng, rim kơdră tang măt hlôi tơlĕch lơ trong jang atŏk tơ iung kmăi kmŏk gơ̆h hơgei nhen jang kiơ̆ khoa hŏk kih thuơ̆t, hơvơn đei lơ bơngai tơmơ̆t jên jang, jang kiơ̆ dôm trong jang gơ̆h hơgei kmăi kmŏk 4.0 lơ̆m chŏh jang sa. Đơ̆ng mă nŏh pơjing đei trong jang hơ iă hrơ̆p mĭnh ‘măng ăn Dak lăk vă atŏk tơ iung chŏh jang sa ‘lơ̆ng, kơ jăp, jang kiơ̆ trong tơlĕch jang atŏk tơ iung “Chŏh jang sa rơgŏh ‘lơ̆ng, pơlei pơla gơ̆h hơgei, kon pơlei gơ̆h hơgei”.

Ƀok Phạm Minh Tấn, Kơ iĕng Kơdră chĕp pơgơ̆r Dơnŏ anĭh Đảng dêh char Dak Lăk tơbăt: Tơdrong tơchơ̆t Pơm lêh hop akom Đảng dêh char ‘măng mă XVII, jăl jang 2020-2025 sơkơ̆t hơdăh atŏk tơ iung chŏh jang sa kiơ̆ trong ‘lơ̆ng, kơ jăp. ‘Nau ‘noh jing mĭnh lơ̆m 6 tơdrong jang tơm vă atŏk tơ iung mŭk drăm kơ Dak Lăk. Gơnơm đơ̆ng nŏh, hơmet ming chŏh jang sa kiơ̆ trong hơ iă, tŏk hơtŏ rim sơnăm iŏk đei vă jê̆ 9%. Chŏh jang sa tŏk bŏk akŏm atŏk tơ iung kiơ̆ trong đei plei ăl, ‘lơ̆ng tơklep hăm đe ‘mĕh vă răt iŏk, ‘măng mă blŭng hlôi iŏk đei hơ iă ăn kơ dêh char. Vă pơjing tơdrong chŏh jang sa kiơ̆ trong gơ̆h hơgei, kơ jăp ‘lơ̆ng, dêh char tŏk bŏk hơnơ̆ng akŏm atŏk kơtang tơmơt jên jang păng hơvơn tơmơ̆t jên jang lơ̆m tơdrong au.

Tơblơ̆ nơ̆r: Amazưt