- Ƀok ăi, Dak Lăk tŏk bŏk jing dêh char đei bri ‘long hơyơ̆l iĕ hloh lơ̆m Tây Nguyên păng tŏ sĕt hloh jô̆ hơtŏ lơ̆m teh đak. ‘Noh kơ yuơ bơ̆ jang atŏk tơ iung bri tim gan lăng ba trŏ lăp ưh hă?

Ƀok Nguyễn Quốc Hưng: Đak Lăk đei bri ‘long hơyơl ưh kơ lơ kơ yuơ dôm hơgăt teh tơnă, jing ‘lơ̆ng kơ Dak Lăk să hloh lơ̆m Tây Nguyên. Truh hloi teh tơ̆ apŭng Ea Sŭp ưh khan teh gôh, mă lei tôch tơnă păng choh jang sa tôch rơvơn. ‘Ngoăih kơ ‘noh, kon pơlei kơdou mơ̆t oei găh lơ năm tơ̆ Dak Lăk, hrei ou đe sư oei tôch mơmat tat. Vă đei tơdrong hơrih sa ‘noh teh jang sa jei iŏk đơ̆ng teh bri. Mă ƀar ‘noh kon jên ăn pơtăm bri hrei ou kon jên tơmơ̆t jang đơ̆ng teh đak nhen lĕ ưh kơ đei yă kiơ. Lăp đei kon jên pơtăm klăm ‘long bri ‘moi kiơ̆ hơgăt teh tơplih iŏk yua bri, găh hơgăt teh ou jĭ tôch kơ iĕ ioch. Kon jên teh đak tơmơ̆t jang ưh kơ đei, rim tơdrong vă jang ODA jei ưh kơ đei, tơmơ̆t jên jang pơtăm bri đơ̆ng kon jên jang FDI jei ưh kơ đei. ‘Meh vă atŏk kơtang lang să bri jĭ tôch mơmat tat.

- Đak Lăk đei mơjĭt kŏng ti mir đak lar, vei lăng groi teh tôch kơ să (vă jê̆ 220.000ha). Tơdrong đe sư atŏk tơ iung bri lơ liơ hŏ ƀok?

Ƀok Nguyễn Quốc Hưng: Pơtăm bri dang ei lăp gơnang lơ̆m rim kong ty choh jang sa-bri ‘long păng kon pơlei mă lei trong chă tơgŭm djru ưh kơ lei lăi. Rim mir đak lar dang ei kon jên jang găh ou nhen lĕ ưh kơ đei yă kiơ, ưh kơ kĕ vă atŏk tơ iung bri ôh.

- Lơ̆m tơdrong mơmat tat lơ loh, Dak Lăk hơmet pơ ‘lơ̆ng lơ liơ păng hlôi iŏk đei dang yơ lơ̆m dôm sơnăm tơ jê̆ ou hŏ ƀok?

Ƀok Nguyễn Quốc Hưng: Hơnih vei lăng kon pơlei dêh char Dak Lăk hlôi đei tơdrong Tơchơ̆t 1237 năr 24/5/2021 găh trong pơprŏ pơtăm ‘long bri păng pơtăm ‘long yơ̆p jăl jang 2021-2025 ‘noh 7.268 ha. Truh dang ei ‘nao lăp khei 9/2024 ‘noh hlôi pơtăm đei 12.582 ha. Sơnăm 2024 ou, jei gô vă pơtăm să hloh trong tơlĕch jang, rŏ năng gô pơtăm đei dang 2.500-3.000 ha pơtêng hăm trong tơlĕch jang 1.817 ha. ‘Nou ‘nao lăp pơtăm bri, găh chă pơtăm ‘long răh rap ou to mĭnh sơnăm pơtăm đei 200.000 dơnơm. Rim sơnăm nhôn jei chă pơtăm ƀlep hăm nơ̆r pơkăp păng să hloh trong pơjjao ăn.

- Hơgăt teh bri phă pơrăm, bơbĭt iŏk sơ̆ tôch kơ să (nhen Dak Lăk chih jô̆ đei dang 128.000ha), dêh char đei trong jang hơmet ming, atŏk tơ iung dơ̆ng hơgăt teh bri lơ liơ ƀok?

Ƀok Nguyễn Quốc Hưng: 128.000ha ou lơ̆m đunh khei năr bơih, dang 20 sơnăm bơih, ưh khan ‘nao ou đĕch ôh, nhôn ưh kơ kĕ vă hơmet pơ ‘lơ̆ng đĭ đăng ôh. Tơdăh bơ̆n ngiơ ngiĕk vei kơjăp teh ăn kơ bri lei lơ̆m khei năr kon pơlei pơngot rơvĕt lei jei ưh kơ lăp mơ̆n. Nhôn gô hơlen ming dơ̆ng bri ‘long lơ̆m tơring. ‘Moi kiơ̆ trong pơprŏ jang kơ dêh char hlôi đei Khul kơdră Teh đak
 kĭ tơchơ̆t păng trong pơprŏ iŏk yoa teh kơ rim apŭng, đơ̆ng noh pơprŏ hơmet teh jang sa, teh oei ăn kon pơlei. Mă lei hơgăt teh ayơ hlôi pơprŏ vă tơ iung pơjing bri ‘long, đei bri ‘noh bơ̆n kơrŭn vei lăng bri kơjăp. Groi teh bri ‘long răm ‘noh pơgơ̆r pơtăm ‘long bri, choh jang sa atŭm hăm pơtăm ‘long bri hloi.

- Tơdrong tơchơ̆t 23 sơnăm 2022 đơ̆ng Hơnih tơm chinh trĭ găh trong atŏk tơ iung tơring Tây Nguyên athei kăl đei bri ‘long yơ̆p kơtang lơ̆m tơring, lăng kơjăp hơmet ming păng atŏk tơ iung bri. Dak Lăk hlôi đei trong jang lơ liơ găh tơdrong ‘nou hŏ ƀok?

Ƀok Nguyễn Quốc Hưng: Lơ̆m khei năr ou tơnap mă chă hơvơn đei kon jên vă pơtăm bri, mă lei nhôn kăl đei pơchoh trong ăn rim Kŏng ty jang bri ‘long adoi nhen rim hơp tak xah păng kon pơlei atŏk kơtang iung jang pơtăm ‘long bri. Nhôn tŏk bŏk atŏk kơtang pơtrŭt athei rim hơnih mơdro sa iĕ tơlĕch kon jên tơgŭm kon pơlei pơm Hla bơar tơchơ̆t bri ‘long pơtăm FSC. Păng mưh bri đei hla bơar tơchơ̆t lơ loh lei kon pơlei đei iŏk yoa sa hơpăh, dăh mă hơnih mơdro sa pơtăm bri gô đei iŏk yoa sa hơpăh lơ hloh, kơjă chă tĕch măt hloh tŏ sĕt hloh dang 10%. ‘Ngoăih kơ ‘noh, găh tơdrong pơm hla bơar bơ̆ jang nhôn hlôi kơrŭn đĭ ai vă pơjing rơvơn vă rim hơnih mơdro sa, kon pơlei pơtăm bri.

Tơdrong tơchơt 58 đơ̆ng Khul kơdră Teh đak ‘nao tơlĕch ăn khei 5/2024 jei hlôi đei mĭnh ƀar trong bơ̆ jang vă tơgŭm djru. Nhôn tŏk bŏk pơjing trong pơprŏ jang păng pơtho tơbăt ăn rim hơnih mơdro sa, kon pơlei pơm lơ liơ pơjing đei rim tơdrong vă jang, dôm trong jang kăl vă đei Teh đak tơgum djru ‘moi kiơ̆ trong bơ̆ jang hle.

- lei ah, bơnê kơ ih ƀok Nguyễn Quốc Hưng, Kơdră chĕp pơgơ̆r Hơnih vei lăng bri ‘long dêh char Dak Lăk hơ!