Kiơ̆ kơtơ̆ng ang đơ̆ng hop akŏm, truh dang ei Đăk Lăk hlôi pơtăm đei hloh 15.200 ha sâu riêng, tŏk 13.000 ha pơtêng hăm xơnăm 2015. Đei yua ăh xơnăm 2022 hloh 150 rơbâu tâ̆n, păng kơchĕng gô tŏk truh 300.000 tâ̆n ăh xơnăm 2025. Găh tĕch ăn teh đak đe, xơnăm 2022 jing xơnăm mă blŭng sâu riêng Đăk Lăk adoi nhen jâ̆p teh đak, đei tĕch ăn teh đak Trung Quốc kiơ̆ pơkăp tơm, tơring tĕch tơlĕch 99% tơmam drăm sâu riêng lơ̆m kơpal teh. Lơ̆m kơsô̆ 53 tơring pơtăm đei tĕch ăn teh đak đe kiơ̆ pơkăp tơm, Đăk Lăk đei 23 tơring, hơkŏp hơgăt xă truh 1.450 hectar.

Tơmoi năm tơmang pơgar sâu riêng hưuh kơ tơ̆ apŭng Krông Pắc - Um: Ngô Minh Phương

Khei năr âu ki, dôm anih jang mŭk drăm tĕch tơmam ăn teh đak đe hăt hot lơ̆m tơdrong hơmet tơring pơtăm tơmam drăm, dơ̆ng tang măt apinh iŏk kơsô̆ pơkăp ăn lơ tơring pơtăm sâu riêng. Mă lei, kơyuơ tam mă pơkăp kơjăp xơnong pơyua păng pơm jang noh hlôi đei tơdrong mă kon pơlei tơkêng anih jang mŭk drăm pơgâ̆m hơlenh. Ƀok Lê Văn Thành, Kơdră Anih choh pơtăm păng vei lăng ‘long pơtăm Đăk Lăk akhan, rim anih jang mŭk drăm athei kơchăng hloh lơ̆m bơ̆ hla bar jang tang măt pơkăp tơring pơtăm păng pơkăp tĕch tơlĕch tơmam drăm, vă tang găn dôm tơdrong đei ƀôh nhen thoi noh: “Anih jang mŭk drăm athei đei kon pơlei drơ̆ng lăp, axong jang tang măt, đei hla bar kĭ pơkăp hơdăh. Oei hla bar pơkăp răt tơmam drăm, noh pơkăp hăm kon pơlei, ưh kơsĭ pơkăp hăm Anih jang Vei lăng ‘long pơtăm, mă lei pơkăp noh duh athei đei pơtrruh ăn anih vei lăng ‘long pơtăm băt hơdăh”

‘Nguaih 23 kơsô̆ pơkăp tơring pơtăm păng 4 anih ‘nŭng ‘măn hlôi đei pơkăp păng drơ̆ng nơ̆r tĕch ăn teh đak đe kiơ̆ pơkăp tơm, Đăk Lăk đei 15 kơsô̆ pơkăp tơring pơtăm oei gô kĭ, 35 kơsô̆ pơkăp tŏk bŏk oei hơmet, hơkŏp hơgăt teh hloh 2 rơbâu hectar. Pơma dơnuh hăm bơngai chih kơtơ̆ng ang ăn VOV ‘nguaih kơ hop akŏm, ƀok Trần Quốc Toàn, Phŏ Kơdră anih Vei lăng tơdrong ‘lơ̆ng tơmam choh pơtăm, ‘long bri, ka hơdang Đăk Lăk ăn tơbăt, đon kơchĕng kơ bơngai pơtăm sâu riêng tơ̆ dêh char dang ei oei hiơ̆r, ưh đei kơchăng tơguăt jang hăm anih jang mŭk drăm tĕch tơmam ăn teh đak đe. Kơyuơ noh, tơdrong tơguăt jang, axong kơsô̆ pơkăp, răt tơmơ̆t tĕch ăn teh đak đe, kăl jang kơjăp, tang găn dôm tơdrong ưh kơ ‘lơ̆ng ning nai kơnh: Đe akhan noh đe ưh đei kĭ pơkăp hăm bu, kơlih duh tam mă lui ngeh kơ bu ôh. Inh apinh kơlihkiơ đe xư ưh kơ lui ngeh, noh đe xư akhan dang ei kĭ, ning mônh kơnh đei tơdrong pơđep nhôn kơnh noh pơm thoi yơ. Thoi noh dôm anih noh athei đei pơkăp hơdăh bu pơm kơdranh vă xek tơlang dôm tơdrong tơgar noh. Lươ̆t mŭk drăm, lươ̆t vei vêr kon pơlei hlôi đei, mă lei xek tơlang dôm tơdrong tơgar đơ̆ng kon pơlei adoi oei tơnap tap.

Vă hơmet tơnăp dôm tơdrong tơhlăk tơhlĭn lơ̆m tơguăt hơtŏk tơmam drăm sâu riêng, hơtŏk tơdrong tơgar lơ̆m tĕch tơmam ăn teh đak đe, khul kơpal Anih vei lăng kon pơlei dêh char Đăk Lăk pơkăl dôm anih jang đei tơrĕk hơtŏk pơ ‘lơ̆ng vei lăng, jang hadoi tơnăp păng xek tơlang tơtom dôm tơdrong đei ƀôh, tơlĕch pơjing jơnŭm jang sâu riêng vă pơ ‘lơ̆ng tơdrong jang mŭk drăm âu. Anih vei lăng kon pơlei dêh char Đăk Lăk duh tơlĕch tơdrong hơlen, hơtŏk kơsô̆ pơkăp tơring pơtăm păng anih ‘nŭng ‘măn sâu riêng. Kiơ̆ pơkăp ‘nao tơlĕch, 6 anih jang tơ̆ dêh char, dôm jơnŭm jang, Anih vei lăng kon pơlei tơ̆ apŭng, tang măt ăn dôm tơring pơtăm păng anih ‘nŭng ‘măn, hlôi đei axong 16 xơnong jang hơdăh, trŏ hăm xơnong jang kơ po vă pơjing dôm tơring pơtăm sâu riêng kơjăp xơđơ̆ng, axong kơsô̆ pơkăp tơring pơtăm păng hơlen kơjăp đơ̆ng pơm tơlĕch truh tĕch sâu riêng lơ̆m dôm pơyan truh.