VOV4.Bahnar  – Jĭ klak chroh nhŭng Châu Phi pơtoi hơbuh hơlơ̆k pơdui đunh khei năr tơ̆ dêh char  Đăk Lăk, hăm vă jê̆ 60 anih hơbuh pơrang đei ƀôh băt đơ̆ng blŭng xơnăm truh dang ei.

          Ƀar anih hơbuh pơrang 'nao tơ̆ Đăk Lăk adoi kơ dôm unh hnam rong kon tơrong, tơ̆ xăh Ea Tul păng Cư M’gar, apŭng Cư M’gar, dêh char Đăk Lăk hăm 10 tŏ nhŭng ƀơm jĭ. Kơsô̆ nhŭng hlôi đei khul jang thŭ y jang hadoi hăm kon pơlei tơlĕch xoh. Jô̆ đơ̆ng blŭng xơnăm truh dang ei, jâ̆p dêh char Đăk Lăk băt đei 59 anih hơbuh pơrang jĭ tơ̆ 52 thôn, pơlei kơ 8 apŭng. Kơsô̆ nhŭng ƀơm jĭ jê̆ 400 tŏ hăm vă jê̆ 24 tâ̆n. Lơ̆m noh, Cư M’gar duh jing minh lơ̆m dôm apŭng hơbuh jĭ klak chroh nhŭng hli hlơt hloh hăm 158 tŏ athei 'nhăk xoh, kơsô̆ 'nhĕm vă jê̆ 11 tâ̆n. Ƀok Nguyễn Quang Đức, Kơdră Anih Rong kon tơrong păng Thŭ y apŭng Cư M’gar ăn tơbăt: Dang ei anih jang thŭ y jang atŭm hăm jơnŭm pơgơ̆r tơring hơlen anih hơbuh pơrang jĭ păng pơkăl bơngai rong kon tơrong pơkăp ưh đei tĕch 'nhĕm nhŭng ƀơm pơrang vă tang găn tơpoh pơrang jĭ.

Lan chih păng pơre nơ̆r