VOV4.Bahnar - Mă đơ̆ng tơ ƀâp lơ mơ mat tat yoa đơ̆ng jĭ Covid -19, mă lei tĕch mơ dro tơ amm đơ̆ng choh jang xa đei tơ̆ tĕh đak đe kơ dêh char Dak Lak 6 khei blŭng sơ năm năm 2022 oei tŏk tôch ‘lơ̆ng đĕch, iŏk đei vă jê̆ 20.000 ti hlak jên (hơ tŏk hăm 845 triu USD), tŏk 60% pơ têng hăm khei âu sơ năm sơ̆. Lơ̆m nŏh chĕh phe oei hơ nơ̆ng jing tơ mam tơm, iŏk đei truh 70% jên tĕch mơ dro đei; đơ̆ng rŏng kơ ‘nŏh jĭ cao su, tiu; oei dôm tơ mam nai nhen đak sut, phe, plei ‘long, ‘nhot, ƀum.

Chĕh phe oei hơ nơ̆ng jing tơ mam tơm tĕch tơ̆ tĕh đak đe đơ̆ng Dak Lak

Anih vei lăng jang kơ măy, tĕch mơ dro dêh char Dak Lak ăn tơ băt: dôm tơ drong tơ chơ̆t tĕch mơ dro nhen: Tơ drong tơ chơ̆t tĕch mơ dro hiôk hian Việt Nam-EU, Tơ drong tơ chơ̆t jang hơ doi tôm tơ drong, gơ̆h hơ gei klĕch tơ ring Thái Bình Dương, Tơ drong tơ chơ̆t tĕch mơ dro tơ ring Asean đei yoa hlôi pơih đei lơ tơ drong ‘lơ̆ng ăn anih tĕch mơ dro tơ mam tơ̆ tĕh đak đe lơ̆m tĕh đak pơ ma atŭm păng tơ̆ Dak Lak pơ ma adrô̆ tĕch tơ mam tơ̆ dôm anih tĕch mơ dro tih nhen: EU, Nhật Bản, Hàn Quốc, Grŭp dôm tĕh đak Đông Nam Á.

Dơ̆ng: Tơ blơ̆