VOV4.Bahnar - Dang ei tiu tŏk bŏk yak mơ̆t lơ̆m pơ yan phĕ, mă lei bơ ngai pơ tăm tiu tơ̆ dêh char Dak Lak ‘noh ưh kơ gan chơt yua kơ sơ năm ‘nâu tiu đei kơ jă mă lei plei ưh kơ lơ. Nhen ŭnh hnam ‘nhŏng Võ Văn Quỳnh oei tơ̆ plei Ta Ra, xăh Hoà Đông, apŭng Krông Pach, dêh char Dak Lak, lơ̆m pơ yan phĕ ‘nâu athei krao điên thoăi jơ̆p hơ nih vă chă bơ ngai phĕ.

Tiu đei kơ jă mă lei plei ưh kơ lơ pơm ăn bơ ngai pơ tăm ưh kơ gan chơt

Yua đơ̆ng jĭ hơ buh Covid-19 đei ƀôh krê hơ mơt kơ na tơ drong chă thuê bơ ngai  phĕ tôch kơ mơ mat tat, kơ jă phĕ truh 220000 hlak jên 1 năr. Tơ drong nai dơ̆ng, sơ năm ‘nâu plei ưh kơ lơ, jur vă jê̆ 1 puăt kơ na mă đơ̆ng kơ jă tiu tŏk bŏk dang tơ̆ 80 triệu hlak jên 1 tấn, iŏk yua kŭm ưh pă đei dôm yơ. Kiơ̆ chih jô̆ đơ̆ng Anih vei lăng găh choh jang sa păng hơ tŏk tơ iung tơ ring tơ rang dêh char Dak Lak, dang ei lơ̆m dêh char đei hloh 33.100 hek tar tiu hăm plei vă jê̆  77.000 tấn. Khei ‘năr âu ki, anih jang vei lăng găh choh jang sa hlôi tơ tă ăn kon pơ lei ‘nĕ kơ pơ̆ih să teh pơ tăm tiu, akŏm hơ tŏk tơ iung tiu kiơ̆ trong kơ jăp ‘lơ̆ng.

Thuem: Tơ blơ̆