VOV4.Bahnar - ‘Năr 20-9, tơ̆ pơ lei tơm Buôn Ma Thuột, Anih vei lăng kon pơ lei dêh char Dak Lak pơ gơ̆r Hop akŏm Tơ drong hiôk păng long nol hăm tơ mam đơ̆ng choh jang sa tơm Dak Lak mưh Việt Nam vang jang lơ̆m dôm tơ drong Tơ chơ̆t mơ dro sa hiôk hian chăl hle (FTA). Kiơ̆ tơ roi tơ băt tơ̆ Hop akŏm, dôm tơ mam đơ̆ng choh jang sa tơm Dak Lak hlôi đei măt tơ̆ hloh 80 anih tĕch mơ dro lơ̆m apŭng plĕnh teh.

Jơ hop akŏm

Mă loi ‘noh, dôm tơ mam nhen cheh phe, kơ su, tiu, đak kơ drot hlôi tơ mơ̆t lơ̆m dôm anih tĕch mơ dro tôch kơ hơ len nhen Mi, Nhật Bản, EU. Mă lei, kơ jă tĕch dôm tơ mam đơ̆ng choh jang sa tơ̆ Dak Lak ưh kơ sơ đơ̆ng; tơ mam đơ̆ng choh jang sa tĕch tơ̆ teh đak đe găh lơ ‘noh tơ mam pơm tam mă ‘lơ̆ng dăh mă athei tĕch kiơ̆ teh đak hơ lam, kơ na kơ jă đei tơ jur lơ.

Ƀok Lê Thanh Hòa pơ ma tơ̆ hop akŏm

Pơ ma dơ nuh tơ̆ Hop akŏm, dôm bơ ngai joăt jang akhan, tơ drong tơ ƀôh trong ăn pơm tơ lĕch ‘noh jĭ tôch kơ gĭt kăl, tơ drong pơm tơ lĕch ‘lơ̆ng, rơ goh đơ̆ng tơ mam choh jang sa athei đei vei lăng kơ jăp, vei sơ đơ̆ng kiơ̆ pơ kăp ‘lơ̆ng đơ̆ng anih tĕch mơ dro tơ̆ teh đak đe păng lơ̆m teh đak, rơ dăh rim tơ drong kơ tơ̆ng ang đơ̆ng tơ mam choh jang sa.

Thuem: Tơ blơ̆