Hơ 'nhăk tơmam drăm tĕch răt lơ̆m pơkăp điê̆n tưh dang ei hlôi jing minh trong tĕch răt tơmam drăm 'nao kơ lơ kon pơlei jang mir tơ̆ Đăk Nông. Hăm tơdrong tơgŭm đơ̆ng dôm jăl jang kơ dêh char Đăk Nông, lơ kon pơlei jang mir, hơp tak xăh hlôi kơdih 'nhăk tơmam drăm po pơm tơlĕch tĕch lơ̆m trang điê̆n tưh. Tơdrong tĕch răt kiơ̆ trong âu duh jing minh tơdrong kăp gĭt gô jing minh lơ̆m dôm trong tĕch tơlĕch tơmam drăm tơnăp hloh, tơgŭm tơplih đon kơchĕng pơm jang ăn kon pơlei jang mir.

Kon pơlei jang mir tơ̆ Đăk Nông ưh kăl năm tơ̆ kơchơ, oei tơ̆ hnam, pơih điê̆n thoăi noh gơh tĕch tơlĕch tơmam drăm kiơ̆ pơkăp điê̆n tưh.  (Rup Báo Gia Lai)

Chĕp lơ̆m ti điê̆n thoăi thŏng minh păng kiơ̆ minh ƀar trong pơpơ̆ ƀônh ƀŏ nhen chŭp um, chih tơroi găh tơmam drăm, tơm a hla chă, kơjă tĕch, tơdrong tơjur kơjă, ƀok Đồng Xuân Liền, kơdră Hơp tak xăh Nam Bình, apŭng Đăk Song, dêh char Đăk Nông hlôi hơ 'nhăk tơmam drăm găr tiu tơmơ̆t lơ̆m anih tĕch răt điê̆n tưh Postmart. Ƀok Liền ăn tơbăt, 2 khei adrol ki Jơnŭm kon pơlei jang mir dêh char păng Ƀưu điê̆n dêh char hlôi jang atŭm pơih lăm hŏk ăn dôm hơp tak xăh vă hơ ‘nhăk tơmam drăm tĕch kiơ̆ pơkăp điê̆n tưh. Mă blŭng ƀok păng dôm bơngai jang lơ̆m hơp tak xăh tam mă juăt, mă lei hăm tơdrong pơtho dăp đon dăp bơnôh, dang ei tơdrong hơ ‘nhăk tơmam drăm kơ po pơkăp lơ̆m trang tĕch tơmam Oline hlôi ƀônh ƀŏ hloh păng mă blŭng hlôi pơkăp đei bơngai chih măt răt tơmam noh ƀok chơt hơ iă hloh: “Kiơ̆ ‘măng pơhrăm, vih tơ̆ hnam chă hơlen băt lơ̆m hla bar chih, atŭm hăm noh gơnơm kon mon chă pơtho ăn dơ̆ng noh ‘măng mă blŭng đei tơbang tơmam drăm kơ hơp tak xăh kiơ̆ pơkăp điê̆n tưh, inh chơt hơ iă. Đơ̆ng rŏng đunh khei năr hlôi đei hla bar, mă tam đei lơ mă lei hlôi đei pơkăp chih măt răt tơmam ăn hơpt ak xăh, âu jing minh tơdrong hơ iă hloh”

Tơmơ̆t tơmam choh pơtăm tĕch kiơ̆ pơkăp điê̆n tưh tơgŭm kon pơlei jang mir dêh char Đăk Nông đei anih tĕch tơmam drăm, hiôk hloh lơ̆m tơdrong chă trong tĕch tơlĕch tơmam choh pơtăm  (Rup iŏk đơ̆ng mạng)

Đơ̆ng mă tơplih tĕch tơmam kiơ̆ pơkăp điê̆n tưh, yă Nguyễn Thị Ngọc Sen tơ̆ phương Nghĩa Đức, pơlei tơm Gia Nghĩa pă đei kơdâu chă tĕch tơpŭng iĕ tơ̆ âu tơ̆ to nhen adrol ki bơih. Yă ăn tơbăt, adrol ki, tơpŭng đei pơtăm jing tơmam tĕch ăn dôm anih tĕch tơlĕch dăh mă tĕch kơtă ăn bơngai răt juăt jue. Đơ̆ng vang akŏm tĕch lơ̆m pơkăp điê̆n tưh, unh hnam yă adrô̆ pĕ akŏm, ‘nŭng mă tơnăp gô đei bơngai Ƀưu điê̆n truh iŏk, chơ pơtruh ăn bơngai răt. Kơtơ̆ng ang lơ̆m tĕch pơkăp điê̆n tưh kơ yă Sen ăn ƀôh, dôm tơmam drăm tơpŭng iĕ nhen: Kim Long, Hoàng Long, Kim Hoàng Hậu… đei pơtăm lơ̆m hnam pơnĭl kiơ̆ pơkăp VietGAP. Tơchơ̆t vei lăng, tuh phŏng, ruih đak... đei pơm kiơ̆ pơkăp ăn kơtoh đĕch. Xut lê̆ dôm tơdrong xơleng kơ đon mă blŭng găh kŏng ngê̆, yă Sen chơt hơ iă ăh tơmam po pơtăm đei hlôi đei tĕch hlot keh kong, đei trong hiôk vă pơtruh ăn tơmoi chă răt yua tơ̆ lơ tơring hloh: “Đei Jơnŭm kon pơlei jang mir dêh char hơvơn năm akŏm pơma đam đang noh đei băt tơmam drăm nhen tơpŭng iĕ đei tơlĕch tĕch pơkăp điê̆n tưh Postmart Đăk Nông. Duh nhen chơt hơ iă, tơroh đei tơmam drăm po lĕch ‘nguaih kơ dêh char vă tơmam drăm po pơm tơlĕch roi năr tŏk lơ. Dang ei minh ‘măng tĕch đei 1,5 tâ̆n mă lei ‘meh vă ning mônh kơnh noh minh ‘măng tĕch athei đơ̆ng 4-5 tâ̆n noh ba iŏk yua adoi tŏk lơ”

Oei lơ̆m pơkăp hơtŏkt ơplih kơsô̆ lơ̆m choh jang xa, Jơnŭm kon pơlei jang mir dêh char Đăk Nông hlôi jang atŭm hăm Ƀưu điê̆n dêh char pơih lăm pơtho păng dôm tơdrong tơgŭm kơtă, truh dang ei hlôi đei 38 tơmam drăm kơ 28 unh hnam pơm jang lơ̆m dêh char đei chih hơnăn lơ̆m anih pơkăp tĕch kơ ƀưu điê̆n. Ƀok Hồ Gấm, Kơdră Jơnŭm kon pơlei jang mir dêh char Đăk Nông ăn tơbăt, dang ei, kon pơlei jang mir păng dôm hơp tak xăh, anih jang mŭk drăm oei ƀơm lơ tơnap tap găh tơdrong tơrĕk hăm kŏng ngê̆ thŏng tin, hla bar pơkăp dôm tơmam drăm ‘lơ̆ng vă tơmơ̆t tĕch lơ̆m pơkăp điê̆n tưh. Kơyươ noh, tơdrong tơgŭm kon pơlei jang mir păng dôm hơp tak xăh khei năr âu jing kăl hloh: “Nhôn ‘meh vă adrol hloh noh tôm tơmam drăm mă trŏ nhen pơkăp OCOP athei đei tơmơ̆t tơbang tĕch, đei xơkơ̆t ‘lơ̆ng păng đei lơ, đei anih dơ̆ng lơ̆m tơdrong jang mŭk drăm. Dar deh bơ̆n athei tơmơ̆t tôm tơmam drăm tĕch kiơ̆ pơkăp âu vă tĕch răt tơnăp hloh, hơdăh, ƀôh chă akŏm păng axong tĕch răt”

Tĕch tơmam drăm kiơ̆ pơkăp điê̆n tưh, tơmam choh pơtăm kơ kon pơlei Đăk Nông gơh đei tơroi tơbang tơmam drăm po tơjê̆ hăm bơngai răt yua hloh, mă lei duh pơkăl hloh găh tơdrong 'lơ̆ng, um ai tơmam drăm. Duh đơ̆ng dôm tơdrong âu pơkăl bơngai jang mir athei tơplih trong pơm jang, tơrĕk truh dôm tơdrong xơđơ̆ng, hơtŏk pơ 'lơ̆ng tơmam drăm, vei lăng păng iŏk yua tơnăp hloh. Kĕ đei thoi noh, tơdrong tơmơ̆t tĕch lơ̆m pơkăp điê̆n tưh pơtơm tơpă đei jơnei, vă kon pơlei pơm trong ăn kơdih tơmam drăm po pơm tơlĕch.