Dôm năr âu, unh hnam ƀok Y Kem, tơ̆ pơlei Bu Păh, xăh Trường Xuân, apŭng Đăk Song, ưh xơđơ̆ng jơhngơ̆m kơlih mir ka phê kơ unh hnam ‘nao ƀơm đe pĕ tơtông. Ƀok  Y Kem ăn tơbăt, hloh 50 tơm ka phê ƀơm đei hrơ̆t kĕt keng, hiong răm pơhlom 400 kĭ. ‘Nâu ưh kơsĭ ‘măng mă blŭng ka phê unh hnam ƀok ƀơm đe pĕ tơtông, kơlih mir ataih đơ̆ng hnam hloh 1 kơsô̆: 3 xơnăm kơ âu bơih, adoi hiong ka phê găh âu. Kơlih pơyan ka phê noh lơ bơngai tơ̆ dôm tơring nai truh pĕ xa jên đe, ba ưh kơ băt bu ôh, tơ̆ thôn mă yơ, noh ăh hiong noh adoi tơnap ƀôh băt.

Ƀok Y Kem tơ̆ pơgar ka phê ƀơm đe pĕ tơtông

Đei băt duh tơ̆ tơring âu pơyan pĕ xơnăm adrol ki, đei 2 unh hnam ƀơm đe pĕ tơtông ka phê. Ve văi lăng mŭk drăm, kon pơlei đei mir pơgar lơ̆m tơring hlôi jang atŭm dih băl pơlơh băl chă hơlen ăh kơmăng. Mă lei tơdrong hiong răm adoi oei đei kơlih mir tơ̆ ataih, ataih đơ̆ng tơring oei xa păng đei lơ trong chôr. Kơyuơ noh, ‘nguaih kơ tơdrong jang hadoi hơtŏk hơlen, tơ̆ minh ƀả jăl trong kon pơlei oei pơlăp camera hơlen vă tang găn đe tơtông. Ƀok Lê Ngọc Ga, tơ̆ xăh Trường Xuân, apŭng Đăk Song ăn tơbăt: Ăh kơmăng noh hơnơ̆ng năm tơmang lăng tơ̆ mir. Đang kơ noh inh pơlăp camera vă hơlen găh anăp hnam, kiơ̆ trong vih vơ̆t. Ăh mă kang ƀô̆ thôn kăl noh inh iŏk um đơ̆ng camera noh vă đe ƀôh băt dôm bơngai phă pơrăm dăh mă klĕ tơtông tơmam pơtăm, vă kon pơlei jang ka phê xơđơ̆ng jơhngơ̆m hloh.

Kŏng ang rôp đei 5 ‘nu tơ tông ka phê

Tơdrong pĕ tơtông ka phê pơm ăn kon pơlei hiơ̆r kơ đon, kơlih đe xư ưh adrô̆ hiong mŭk drăm, mă dôm tơm ka phê hơnơ̆ng ƀơm đe tơtông gơ̆ pơđĭ, tơnap kơ tŏk giơ̆ng, pơm tơjur plei hăm pơyan đơ̆ng rŏng. Ưh adrô̆ tơtông, lơ bơngai oei iŏk khei pĕ ka phê vă pơm glăi. ‘Nao âu, minh unh hnam tơ̆ xăh Đăk Sin (apŭng Đăk R’lấp), hlôi ƀơm bơngai pĕ ka phê hơpăh tơtông gr honđa păng jên hu, măh đang kơ noh kơdâu klenh. Oei tơ̆ phương Quảng Thành (pơlei tơm Gia Nghĩa), khul kŏng ang ƀôh băt minh ‘nu kơdâu klenh mă đe tơbang chă rôp hrơ hrâu lơ̆m khul truh jang hơpăh xa jên...

Pơyan pĕ ka phê, kon pơlei hiơ̆r kơ đon hăm tơdrong tơtông ƀôh lơ

Vă vei xơđơ̆ng tơpôl lơ̆m pơyan pĕ ka phê, rim tơring tơ̆ Đăk Nông hlôi hơtŏk pran tơdrong tơroi tơbăt, tơbang găh trong pơhlŭ pơhlôm đơ̆ng khul pơm kơnê̆. Khul kŏng ang tơ̆ tơring duh hơtŏk hơlen tơ̆ dôm tơring tơm, anih oei xa hăm bơngai truh jang, bơngai jang xa hơpăh kiơ̆ pơyan... Kŏng ang Đăk Nông tơroi hăm kon pơlei ăh iŏk bơngai jang noh athei hơlen hla bar vih vơ̆t oei xa păng pơm kiơ̆ ƀlep tơdrong chih măt oei xa kiơ̆ pơkăp đơ̆ng khôi lươ̆t.

Đăi  wĭ  Nguyễn Văn Đô, Phŏ Kơdră Kŏng ang xăh Trường Xuân akhan, atŭm hăm khul kơpal, tơdrong kơchăng đơ̆ng kon pơlei gô tơgop tang găn dôm tơdrong pơm glăi đei ƀôh lơ̆m pơyan pĕ ka phê. Nhen tơdrong đei ƀôh đơ̆ng unh hnam ƀok Y Kem, kŏng ang xăh hlôi hơlen, tenh kuăng rôp đei 5 ‘nu pĕ tơtông ka phê. Đăi wĭ Nguyễn Văn Đô ăn tơbăt: Lơ̆m pơyan pĕ ka phê rim xơnăm noh kŏng ang xăh duh tơlĕch vei lăng tơmam choh pơtăm, tơroi tơbăt vă kon pơlei kơchăng tang găn păng tơjră dôm tơdrong pơm glăi, mă hăt noh tơdrong klĕ tơtông mŭk drăm. Kŏng ang xăh duh hơnơ̆ng jang atŭm hăm khul vei xơđơ̆ng tơpôl, khul kon pơlei vei xơđơ̆ng tơpôl chă hơlen vă da ƀiơ̆ hiong răm ăn kon pơlei lơ̆m pơyan pĕ yua. ‘Nguaih kơ noh duh băt hơdăh kơsô̆ bơngai đơ̆ng tơring nai truh pơm jang dăh mă erih xa; păng hơnơ̆ng krao pơtho akhan hăm dôm bơngai mă ƀôh nhen vă tơtông mŭk drăm đe.