‘Nhŏng Lê Đình Tứ- thôn 4, thĭ trân Đak Đoa, apŭng Đak Đoa, dêh char Gia Lai ‘nao pơm joăt hăm pơtăm krô̆i hroi sơnăm blŭng a, hăm kon jên tơmơ̆t jang vă jê̆ 100 triu hlak jên, lơ̆m mir pơgar đei 300 dơnơm. ‘Nhŏng Tứ lui akhan, ba jang kiơ̆ tuh mơ̆r rơgoh ‘lơ̆ng, plei krô̆i hroi rơgoh ‘lơ̆ng gô tĕch đe kơ jă măt ƀiơ̆. Mă lei phĕ ‘măng mă blŭng, chă tĕch lăp đei 4.000 hlak jên lơ̆m 1 kĭ. Tơdăh hơnơ̆ng lơ au, rŏ năng ŭnh hnam gô hiong răm kơtang.

Hơmŏ “krô̆i roi rơgoh chă tĕch măt ƀiơ̆” nhen ‘nhong hlôi tơchĕng, rŏ năng tơnap mă đei tơpă:“Plei krô̆i hroi đum ‘nŏh phĕ tĕch đĕch bơih. Tơdăh đum mă bơ̆n ưh kơ phĕ tĕch ‘nŏh hăp jei hơlŭng, jei pă gơ̆h vă pơm kiơ. Ba chă rơ̆ih plei krô̆i hroi kơ loăi 1 vă tĕch jei tơnap, găh plei krô̆i kơ loăi 1 jei tôch tŏ sĕt. Âu ki, đe chă pơtho pơm đei plei krô̆i hroi rơgoh mă lei rŏ năng ưh kơ ƀônh ôh kơ yuơ kăl năm test, test ‘nŏh kla ăn kơ đe jên 3 triu hlak jên lơ̆m 1 ‘măng. Đe sư gơ̆t jên bơ̆n đơ̆ng 15 truh 20 tân mă kla ăn, kơjă tĕch măt hloh 3 ‘măng hăm plei krô̆i hroi hmă".

Hrei au, tơ̆ dêh char Gia Lai đei tơring pơtăm ngăl krô̆i hroi hăm hloh 5.000ha đei pơtăm jơ̆p lơ̆m 15 lơ̆m 17 apŭng, thĭ xah, pơlei tơm; atŭm hăm 3 hnam kmăi pơm tơlĕch plei krô̆i hroi hăm lơ̆m 1 sơnăm pơm tơlĕch đei truh kơhrĕng rơbau tân. ‘Ngoăih kơ ‘nŏh, Gia Lai jei đei 20 hơnih tăh ‘nŭng păng 19 tơring pơtăm hlôi đei ƀơk ăn mã kơsô̆. Mă lei dôm trong jang au jei ưh kơ kĕ găn ga tơdrong tơjur kơjă plei krô̆i hroi.

Ƀok Lê Tấn Hùng-Kơ iĕng kơdră chĕp pơgơ̆r Hơnih vei lăng Choh jang sa păng Atŏk tơ iung tơring tơrang apŭng Đak Đoa tơbăt: hrei au đei 20% lơ̆m kơsô̆ 700ha krô̆i hroi tơ̆ apŭng, hlôi đei tơgoăt jang hơdoi tĕch răt hăm mĭnh ƀar hơnih mơdro sa. Mă lei kơtă hloi tơ̆ kon pơlei choh jang sa tơgoăt jang hơdoi jei oei tim mă iŏk đei kơjă măt ƀiơ̆. Kơ yuơ khei ‘năr kĭ pơkăp ‘nŏh lơ̆m mă kơjă plei krô̆i hroi măt, kon pơlei ưh kơ tĕch ăn rim hơnih mơdro sa mă lei tĕch ăn kơ đe nai măt hloh ƀiơ̆:“Pơkăp dih băl ƀar păh hơnih mơdro sa păng ŭnh hnam jang đơ̆ng kĭ pơkăp blŭng a hloi ‘nŏh, phĕ đei dôm yơ tĕch pơ đĭ ăn hơnih mơdro sa hăm kơjă hlôi pơkăp dih băl. Dăh mă chă pơkăp dih băl răt kiơ̆ kơjă đe tĕch mơdro au to, kon pơlei rơ̆ih tĕch kiơ̆ kơjă đe chă răt au to. Rim hnam kmăi oei hơnơ̆ng chă răt dôm tơmam drăm pơkăp dih băl kiơ̆ kơjă đe tĕch mơdro. Kơjă tĕch mơdro au to măt ‘nŏh răt măt, kơjă tơjur ‘nŏh răt re kiơ̆ đe tĕch mơdro  dôm yơ, răt dôm noh”.