VOV4.Bahnar - ‘Năr 23/9, tơ̆ pơ lei tơm Đà Lạt, Anih pơ trŭt choh jang sa kơ Teh đak jang hơ dai hăm Anih vei lăng găh Choh jang sa păng Hơ tŏk tơ iung tơ ring tơ tang dêh char Lâm Đồng pơ gơ̆r Hop akŏm pơ trŭt choh jang sa hăm hơ năn “ Tơ mơ̆t yua ‘lơ̆ng ki thuơ̆t lơ̆m hơ tŏk tơ iung choh jang sa hơ gei lăp hăm tơ plih tŏ ‘mi kial”. Hloh 150 ‘nu bơ ngai tang măt ‘noh jĭ dôm kang ƀô̆ vei lăng, bơ ngai joăt jang choh jang sa, bơ ngai tang măt dôm Hơp tak xăh, anih jang mơ dro sa păng kon pơ lei jang chŭn mir tơ̆ 7 dêh char, pơ lei tơm vang truh akŏm.

Jơ hop akŏm pơ ma dơ nuh

Dôm bơ ngai joăt jang, bơ ngai vei lăng, bơ ngai tang măt Hơp tak xăh, anih jang mơ dro sa păng kon pơ lei jang chŭn mir đơ̆ng dôm dêh char Lâm Đồng, Phú Yên, Khánh Hòa, Thừa Thiên Huế, Đà Nẵng, Đồng Nai păng pơ lei tơm Hồ Chí Minh hlôi ‘măn lơ jơ pơ ma dơ nuh dôm tơ drong găh hơ tŏk tơ iung choh jang sa kơ măy kơ mŏk ‘nao kiơ̆ trong hơ gei, tơ gŭm kơ chăng lơ̆m pơm tơ lĕch, hơ met pơ ‘lơ̆ng tơ drong pơ yan jang, tơ jur tơ drong pơ mơ̆ng lơ̆m tŏ ‘mi kial păng pơm lăp ‘lơ̆ng ‘meh vă anih tĕch mơ dro găh tơ mam ‘lơ̆ng. Lơ̆m noh, tơ roi lơ hloh ‘noh jĭ dôm trong jang tơ gŭm vă hơ tŏk tơ iung choh jang sa hơ gei; tơ drong proh hơ met, tơ mơ̆t jên jang ming man anih jang kăl; dôm trong jang găh khoa hŏk kơ măy kơ mŏk, jên jang kŭm nhen hơ tŏk tơ iung bơ ngai jang, tơ drong gơh iŏk yua vei lăng păng pơm tơ ‘ngla kơ măy kơ mŏk lơ̆m tơ drong jang pơm tơ lĕch choh jang sa...

Thuem: Tơ blơ̆