VOV4.Bahnar - Kơsơ̆ năr 5/9, tơ̆ Hà Nội, Dơnŏ anĭh tơm vei lăng Chŏh jang sa păng Atŏk tơ iung tơring tơrang hop akŏm tơbăt jăl 3 tơroi tơbăt tơdrong pơm tơlĕch tĕch mơdro tơ̆ tĕh đak đe tơmam drăm chŏh jang sa păng tơlĕch jang tơdrong jang lơ̆m dôm khei hơtuch sơnăm.

Kơdră chĕp pơgơ̆r Phùng Đức Tiến hơdrin drŭh kiơ̆ đei tơlĕch jang tĕch mơdro tơ̆ tĕh đak đe tơmam drăm chŏh jang sa iŏk đei 50 ti dolar Mi

8 khei au ki, kơ jă tơmam drăm chŏh jang sa, ‘long, ka hơdang iŏk đei dang 36 ti 300 trĭu dolar Mi, tŏk hlŏh 13% pơtêng hăm dôm khei au sơnăm hơdrol. Pơ đĭ lơ̆m hơnĭh hơnơ̆ng vei kơ jăp atŏk kơtang, sơđơ̆ng phe sa ƀa sŏng, tơmam drăm sa, tơgop pơm sơđơ̆ng rim trong hơmet ăn tĭh tên kơ tơdrong jang mŭk drăm. ‘Ngoăih tơdrong hơ iă găh dôm tơmam drăm chŏh jang sa tĕch mơdro tơ̆ tĕh dak đe iŏk đei vă jê̆ 15 ti hlak jên lơ̆m 8 khei, tŏk 7,4%, dơnŏ anĭh vei lăng chŏh jang sa jei ƀô̆h đei 7 tơmam drăm tĕch mơdro tơ̆ tĕh đak đe iŏk đei hlŏh 2 ti dolar Mi ‘nŏh: Chehphe, ksu, phe, ‘nhot plei ‘long, plei găr sơlơ̆k, tơmam drăm pơm tơlĕch đơ̆ng ‘long. Jei tơ̆ hop akŏm tơbăt au, rim hơnĭh jang găh Dơnŏ anĭh tơm vei lăng Chŏh jang sa păng Atŏk tơ iung tơring tơrang jei pơm hơdăh hlŏh dơ̆ng rim trong atŏk kơtang lơ tơmam drăm tĕch mơdro iŏk đei kơ jăp; kơ jă đak xăng đak dau tŏk măt pơm kơnê̆ trŭh chŏh jang sa păng rong ka hơdang; rim trong vă hơmet pơ ‘lơ̆ng đơ̆ng Dơnŏ anĭh bơ̆ jang Châu Âu (EC) hăm ka hơdang Việt Nam, hơdrin iŏk đei tơlĕch hơdrol 50 ti dolar.

Tơblơ̆ nơ̆r: Amazưt