VOV4.Bahnar -  Pơ gê 11/2, tơ̆ Hà Nội, Anih tơm vei lăng choh jang xa păng atŏk tơ iung tơ ring tơ rang pơ gơ̆r hop akŏm trư̆k tuyê̆n lơ̆m tĕh đak găh tơ drong tang găn jĭ tơ̆ kon tơ rong păng ka hơ dang sơ năm 2022.

Sơ năm 2021, ‘nhĕm kon tơ rong tŏk hlŏh 4% pơ têng hăm sơ năm 2020, mă lei 1,2 tơ drong jĭ krê hơ mơt lơ̆m sơ năm âu ki pơm hiong răm hlŏh 2.500 ti hlak jên. Anih tơm vei lăng choh jang xa păng atŏk tơ iung tơ ring tơ rang hlôi iŏk ƀơk ăn dôm tơ ring dôm jĭt rơ bâu kơ liêu vắc-xin păng lơ kơ loăi pơ gang pơ lôch pơ rang jĭ ăn kon tơ rong, kon kơ lap păng ka hơ dang. 

Kiơ̆ tơ drong tơ chĕng atŭm, sơ năm 2022, jĭ tơ̆ kon tơ rong păng ka hơ dang oei tôch krê đĕch. Yoa thoi nŏh, tơ̆ hop akŏm, dôm bơ ngai tang măt pơ ma nuh găh trong tơ lĕch jang tang găn dôm tơ drong jĭ krê hơ mơt tơ̆ kon tơ rong păng ka hơ dang vă pơ jing tơ drong ‘lơ̆ng ăn tơ drong rong hơ lơ̆k nhŭng, hơ tŏk tơ drong rong kon tơ rong pơm măh mai ‘nhĕm xa păng pơ yoa ăn tơ drong tĕch tơ̆ tĕh đak đe.   

Dơ̆ng: Tơ blơ̆