Sơng hơvơn nhôn lơ̆m pơbŭng hnam ‘lơ̆ng liĕm păng đei tôm mŭk drăm, ƀok Kră Jăn Ha Sung, oei tơ̆ pơlei R’Chai, tơring Phú Hội, apŭng Đức Trọng (Lâm Đồng) chơt hơ iă tơbăt, gơnơm ‘mi rŏ tŏ hơlăng, kơjă tơmam drăm măt păng tĕch mơdro sơđơ̆ng kơna pơyan krô̆i hroi au ki hlôi hơnhăk ăn unh hnam ƀok jang sa iŏk đei trŭh kơhrĕng trĭu hlak jên. Atŭm hăm đơ̆ng jang chehphe 2ha, 4sao ‘nhot sa, ŭnh hnam ƀok ưh khan yak hlŏh tơnap tap kơ yuơ đei ƀơm jĭ Covid-19 pơrăm, mă lei oei mong răk đei kon jên vă tơmơt jang sa.Kiơ̆ đơ̆ng ƀok Kră Jăn Ha Sung, iŏk đei au gơnơm lơ̆m tơgoăt jang hơdoi păng tĕch mơdro tơmam drăm kiơ̆ hơnih mơdro sa, Hơp tak xah lơ̆m tơring pơkăp răt iŏk. Mŭk drăm sơđơ̆ng, jang sa iŏk yua kơjăp kơna Têt au ŭnh hnam ƀok pơgơ̆r Têt chơt hơ iă ‘nă hal atŭm hăm pơlei.“Găh muk drăm đơ̆ng rŏng jĭ hơbuh Covid-19 truh dang ei, ŭnh hnam nhôn jang sa pơtăm krô̆i hroi atŭm hăm pơtăm hơmrĕ kơna đei iŏk yua kơjăp. Lơ̆m sơnăm 2021 hloi, mă đơ̆ng jĭ hơbuh pơrăm kơtang mă lei jang sa iŏk đei kơjăp mơ̆n. Sơ̆ kon pơlei bơ̆n tim mă băt khoa hŏk kih thuơ̆t, tơdrong jang sa tim mă iŏk đei lơ. Dôm sơnăm tơjê̆ au, hŏk pơhrăm đơ̆ng bôl boăl bơngai Yuăn, ‘ngoăih chehphe ‘nŏh kon pơlei chă pơtăm ‘long pơtăm au to jang kiơ̆ kmăi kmŏk hơgei kơna muk drăm ŭnh hnam atŏk tơ iung”.

Trong jang pơtăm ‘nhot, pơkao, kiơ̆ pơkăp răt iŏk, vang iung jang lơ̆m jang sa hơdoi tŏk bŏk lang să lơ̆m kon pơlei K’Ho oei tơ̆ Phú Hội. Hrei au, tơring hlôi đei 900 ŭnh hnam kĭ pơkăp jang hơdoi păng răt iŏk tơmam drăm hăm rim hơnĭh mơdro sa, Hơp tak xah, lơm au đei 300 ŭnh hnam kon kông. Atŭm hăm ‘nŏh, kon pơlei hơdrin jang kiơ̆ khoa hŏk kih thuơ̆t lơm chŏh jang sa iŏk yua kơjăp. Tơroi găh tơdrong tơplih pơlei pơla kơ dih, mŏ K’Hoan, bơngai K’ho oei tơ̆ pơlei Chi Rông, tơring Phú Hội, tơroi:“Sơ̆, kon pơlei K’ho lăp jang chŭn na ƀa đak 1 pơyanpăng jang chehphe kră krŭt, plei ư̆h kơ ăl, tim mă băt jang kiơ̆ khoa hŏk kih thuơ̆t, kơna tơdrong erĭh sa kơ kon pơlei tơƀơ̆p tơnap tap. Dôm sơnăm kơ au đei teh đak lăng ba kơ jăp chă tơgŭm djru, pơtho tơbăt kih thuơ̆t jang sa chă tơgep chehphe, jang ‘nhot, tơdrong erĭh sa kơ kon pơlei hlôi tơplih hơdăh pơtêng hăm sơ̆”. 

Kiơ̆ đơ̆ng ƀok Nguyễn Thành Trung, Kơ iĕng Kơdră chĕp pơgơ̆r tơring Phú Hội, gơnơm pơ̆n tơplĭh trong jang sa kơna, tơdrong jang sa lơ̆m tơring iŏk đei hlŏh 270 triu hlak jên lơ̆m 1 ha, 1 sơnăm. Ŭnh hnam dơnuh lơ̆m tơring dang ei lăp pă 1%. Vă hơnơ̆ng kiơ̆ yok dôm trong jang jơnei au, lơ̆m sơnăm 2023, kơdră đảng, kơdră chĕp pơgơ̆r tơring gô hơnơ̆ng atŏk kơtang trong jang tơplĭh ‘long pơtăm, tơplĭh jang sa. Mă kăl hơnơ̆ng tơplih ‘nao jang sa kiơ̆ trong atŏk tơ iung mŭk drăm tơpôl, mă kăl lơ̆m tơring kon kông. Ƀok Nguyễn Thành Trung, tơroi:“Lơ̆m khei năr kơnh, nhôn gô pơgĕnh rim kon jên au to vă tơmơ̆t jang ăn tơring kon kông, tơlĕch lơ̆m chŏh jang sa, pơjing rơvơn ăn đe sư atŏk tơ iung mŭk drăm ŭnh hnam. Nhôn pơm gơng tơrŏh vă kon pơlei chă tơƀơ̆p dĭh băl hăm hơnih mơdro sa, hơp tak xah vă đe chă lăng, hŏk pơhrăm đơ̆ng rim trong jang hơ iă lơ̆m jang kiơ̆ kmăi kmŏk hơgei. Đơ̆ng nŏh đei trong tơplih ‘nao ‘long pơtăm, atŏk iŏk đei kơjăp lơ̆m mĭnh hơgăt teh, atŏk jang sa iŏk đei kơjăp hlŏh ăn kon pơlei”.

Hrei au, Phú Hội đei 6.700ha teh jang sa, lơ̆m au đei 3.680ha tĕh chŏh jang sa kiơ̆ kmăi kmŏk hơgei. ‘Nau jing jơ rơvơn ‘lơ̆ng hlŏh vă hơnơ̆ng pơih să trong jang hơdoi 2 păh kon pơlei păng hơnih mơdro sa, sơđơ̆ng tĕch răt tơmam drăm chŏh jang sa, atŏk erĭh sa păng jơhngơ̆m đon kon pơlei roi ‘lơ̆ng rŏ hơbŏ nhen hlŏh dơ̆ng.