VOV4.Bahnar - Đơ̆ng năr 15 trŭh năr 18/9 tơ̆ Hà Nội gô pơgơ̆r “Jơnŭm kơchơ Pơdă tơmam drăm Chŏh jang sa Apŭng plĕnh tĕh ‘măng mă 22 - AgroViet 2022” ‘nau nơ̆r tơbăt đei pơma tơlĕch lơ̆m jơ hop akŏm tơroi tơbăt đơ̆ng Hơnĭh tơm Pơtrŭt mơdro sa pơgơ̆r năr 7/9 tơ̆ Hà Nội.

Hop akŏm tơbăt AgroViet 2022

Kiơ̆ Khŭl chĕp pơgơ̆r, Jơnŭm kơchơ Pơdă tơmam drăm Chŏh jang sa Apŭng plĕnh tĕh AgroViet 2022 gô đei vă jê̆ 100 hơnĭh jang, hơnĭh mơdro sa lơ̆m tĕh đak păng tĕh đak đe vang năm, hăm 170 hơdrơ̆r tơmam drăm. Lơ̆m au đei 28 hơdrơ̆r tơmam drăm kơ rim Hơnĭh mơdro sa tĕh đak đe hăm lơ tơmam drăm chă pơdă ‘lơ̆ng liĕm nhen: bào ngư, đak sut kơdrot Manuka, đak rơmă olive, đak iŭ; tơmam drăm găh kmăi kmŏk chŏh jang sa, kmăi kmŏk rŏr iŏk đak lê gai... Mă kăl, đơ̆ng rŏng 2 sơnăm kơ yuơ jĭ hơbŭh Covid-19 măh pơgơ̆r kiơ̆ trong trư̆k tuyên, jơnŭm kơchơ AgroViet 2022 ‘măng mă au gô đei vang năm đơ̆ng rim hơnĭh mơdro sa kơ 6 tĕh đak ‘nŏh: Austraylia, Nga, Nhật Bản, Trung Quốc, Thái Lan, Indonesia.

Tơblơ̆ nơ̆r: Amazưt