Đak Lăk ‘nŏh mĭnh lơ̆m dôm dêh char đei lơ bri brăh lơ̆m teh đak, đei mĭnh ƀar xem bri gĭt kăl, đei hơnăn lơ̆m Kơsơ̆p hla bơar ƀrê Việt Nam păng Apŭng plĕnh teh. Lơ̆m hơdrin vei lăng năng tông xem bri brăh, đơ̆ng sơnăm 2019 truh dang ei, Đăk lăk hlôi sơng iŏk hơchăng dơ̆ng lơ̆m bri ăn lơ xem bri brăh. Lơ̆m au đei 62 tŏ xem bri brăh kăl, hui kơ đei kơ yuơ kon pơlei năm ba ăn.

Adoi, rim hơnih bơ̆ jang hlôi jang kiơ̆ lơ trong jang pơtho tơbăt, dăr lăng, xek tơlang vă tang găn rim tơdrong pơm glăi, tơlĕch jang lơ tơdrong jang vă tang găn đe chă hơngoang, tĕch răt glăi khôi luơ̆t rim xem bri brăh păng ‘nhĕm xem bri brăh lơ̆m dêh char. Tơ̆ jơ pơma dơnuh, lơ kơdră tang măt akhan, tơdrong chă tĕch răt, chơ pơdŭ xem bri brăh hrei au oei ƀôh hơnơ̆ng, trong pơdăr kơ đe sư roi hrĕp, pơjing tơdrong long tih tên ăn trong jang vei lăng năng tông xem bri brăh. Vă yak hloh tơdrong long au, kăl vang iung jang hơdoi đơ̆ng Tơpôl khul mơdro sa, iung jang hơdoi kơjăp hăm rim hơnih bơ̆ jang, kon pơlei lơ̆m atŏk kơtang dăr joang rim tơdrong pơm glăi tĕch răt xem bri brăh; tơlĕch rim tơdrong jang pơtho tơbăt, tơplih jơhngơ̆m đon hlôh vao kơ kon pơlei găh vei lăng năng tông xem bri brăh. Lơ̆m tơdrong pơgơ̆r, Hơnih chĕp pơgơ̆r hlôi tơƀôh tơbăt Pơdă rup chhơ̆ rim xem bri brăh hăm hơnăn “Pơsư̆ ăn Jơnơr đơ̆ng rŏng - Save wildlife save our life”. Rim hơnih mơdro sa kĭ pơkăp jang kiơ̆ trong tơchăr “Pơlei tơm Buôn Ma Thuột pơma ưh hăm tĕch răt xem bri brăh”. Hơnih vei lăng Bri brăh dêh char hăm Khul hơnih mơdro sa pơgơ̆r năm tơmang lăng Hơnih vei rong rôih, Mir pơgar teh đak Yok Don.