VOV4.Bahnar - Giĕng âu ki, tơ̆ Hà Nội, Anih tơm vei lăng choh jang xa păng atŏk tơ iung tơ ring tơ rang pơ gơ̆r hop akŏm trư̆k tuyê̆n lơ̆m tĕh đak hŏk pơ hrăm, hlôh vao kơ jăp tơ drong tơ chơ̆t kơ sô̆ 19 đơ̆ng Khul kơ dră chĕp kơ̆l Trung ương Đảng jăl 13 găh choh jang xa, kon pơ lei jang chŭn mir, tơ ring tơ rang truh sơ năm 2030, trong jang truh sơ năm 2045. Pơ ma tơ̆ hop akŏm, Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan pơ ma hơ dăh: kon pơ lei jang chŭn mir athei jing tơm tơ ‘ngla lơ̆m tơ drong pơ vei đơ̆ng choh jang xa, kon pơ lei jang chŭn mir, tơ ring tơ rang.

Bơ̆ jang kiơ̆ tơ drong tơ chơ̆t găh choh jang xa, kon pơ lei jang chŭn mir, tơ ring tơ rang păng trong jang atŏk tơ iung choh jang xa, tơ ring tơ rang kơ jăp ‘lơ̆ng, khei ‘năr âu ki, Anih tơm vei lăng choh jang xa păng atŏk tơ iung tơ rang tơ rang  jang hơ doi hăm Ban Tuyên giáo Trung ương, Anih vei lăng mŭk drăm Trung ương, pơ gơ̆r hŏk pơ hrăm, roi tơ ƀôh, hlôh vao kơ jăp tơ drong tơ chơ̆t. Lơ nơ̆r pơ ma lơ̆m hop akŏm vang roi tơ ƀôh dôm tơ drong kăl, dôm trong  jang ‘nao, đei yoa mưh atŏk tơ iung choh jang xa, kon pơ lei jang chŭn mir, tơ ring tơ rang vă năm truh tơ drong tơm ‘nŏh pơ jing “Choh jang xa rơ gŏh, tơ ring tơ rang ‘nao ‘lơ̆ng, kon pơ lei jang chŭn mir rơ gei”.

Ƀok Nguyễn Hồng Sơn, Kơ dră Anih tơ  chĕng hơ len khoa hŏk choh jang xa Việt Nam akhan: “Choh jang xa, kon pơ lei jang chŭn mir păng tơ ring tơ rang đei tơ drong pơ vei tôch kơ jăp hăm băl. Atŏk tơ iung choh jang xa kŭm jing tơ drong ‘lơ̆ng vă atŏk tơ iung kon pơ lei jang chŭn mir păng tơ ring tơ rang ‘nao păng hơ drơ̆k dơ̆ng. Lơ̆m tơ drong tơ chơ̆t păng trong vă jang hlôi chih hơ dăh, khoa hŏk păng kơ măy kơ mŏk ưh lăp vă pơm tơ lĕch tơ mam đei kơ jă măk, pơ jing trong jang tŏk pran đĕch mă oei đei tơ drong jang tôch gĭt kăl dơ̆ng ‘nŏh jĭ pơ tho khul bơ ngai jang rơ gei. Găh anih tơ chĕng vă jang hơ doi hăm dôm anih jang đei ƀơm truh păng anih tĕch mơ dro pơ gơ̆r pơ tho tơ ƀôh tơ drong rơ gei ‘lơ̆ng đơ̆ng ki thuơt, kơ măy kơ mŏk kŭm nhen pơ tho ăn kon pơ lei hlôh vao jrŭ ƀiơ̆ vă hơ tŏk tơ drong iŏk yoa kơ măy kơ mŏk ‘nao lơ̆m tơ drong choh jang xa, kiơ̆ đơ̆ng noh pơm hơ tŏk tơ jă tơ mam đơ̆ng choh jang xa”.

Dak Lak sơng iŏk jên tơ mât jang atŏk tơ iung choh jang xa kơ jăp ‘lơ̆ng

                ‘Nao âu, tơ̆ “Lêh Sâu riêng Krông Pach ‘măng mă 1 – 2022”, Dơ nŏ anih vei lăng kon pơ lei apŭng Krông Pach, dêh char Dak Lak pơ gơ̆r hop akŏm “Tơ lĕch trong krao hơ vơn tơ mât jên jang păng atŏk tơ iung tơ mam, tơ drong choh jang xa kơ jăp ‘lơ̆ng sơ năm 2022”. Pơ ma lơ̆m hop akŏm, ƀok Trần Hồng Tiến, Bí thư đảng apŭng Krông Pach ăn tơ băt, tơ ring đei hlŏh 53.000 ha tĕh choh jang xa, 6.100 ha tĕh đei dơ nâu đak, đei iŏk yoa hơ nơ̆ng, ‘nâu jĭ tơ drong ‘lơ̆ng vă apŭng sơng iŏk jên tơ mât jang ăn tơ drong choh jang xa. Tơ drong ‘lơ̆ng đơ̆ng choh jang xa kơ apŭng oei tôch lơ. Yoa thoi nŏh, apŭng hơ pơi ‘mĕh hơ nơ̆ng sơng iŏk jên tơ mât jang, tơ gop jơ hngâm tưk tơ iung mŭk drăm tơ pôl, tŏk roi pran.

       Ƀok Trần Hồng Tiến pơ ma: “Nhôn vă tơ gŭm ăn dôm anih tĕch mơ dro găh trong pơm hla ar vă anih tĕch mơ dro pơm hla ar hrĕnh hlŏh, ‘lơ̆ng hlŏh. Mă 2, nhôn oei pơ tho ăn dôm tơ ring mưh dôm bơ ngai tơ mât jên jang truh nhôn vă tơ gŭm tôch ai găh tơ drong chưk pơ ‘ngoăih tĕh tơ dăh bơ ngai tơ mât jên jang kĭ pơ kăp hăm tơ ring nhôn vă jang xa. Hăm kơ dră chĕp kơ̆l tơ ring nhôn, vă yak hơ doi hăm dôm bơ ngai tơ mât jên jang mưh chă hơ len năng tơ drong tơ mât jên jang tơ̆ tơ ring”.

        Đơ̆ng tơ pă tơ̆ yăn âu tơ̆ tơ ring, ƀok Cao Văn Cường, Kơ dră vei lăng choh jang xa păng atŏk tơ iung tơ ring tơ rang dêh char Thanh Hóa ăn tơ băt: “Dôm anih tơm, anih jang kơ Trung ương tơ tom tơ lĕch lơ hla ar chih, nơ̆r athei Anih tơm jăh tơ roi ăn Thủ tướng tĕh đak Tơ lĕch tơ drong jang, mưh đei tơ drong jang ‘nŏh dôm dêh char, plt vă tơ lĕch jang kiơ̆ tơ̆ jơ̆p tơ ring lơ̆m tĕh đak hloi, lăp hăm rim tơ drong đei tơ̆ tơ ring. Jăh tơ lĕch tơ drong tơ chơ̆t 57 găh pơ lung anih tĕch mơ dro tơ mât jên ăn tơ drong choh jang xa, kon pơ lei jang chŭn mir, tơ ring tơ rang, kiơ̆ kơ ‘nŏh dêh char gô đei tơ drong tơ chơ̆t lăp ‘lơ̆ng, pơ lung anih tĕch mơ dro tơ mât jên lơ̆m tơ drong choh jang xa, kon pơ lei jang chŭn mir păng tơ ring tơ rang.”

Kơ dră tơm vei lăng tơ drong choh jang xa păng atŏk tơ iung tơ ring tơ rang Lê Minh Hoan pơ ma lơ̆m hop akŏm

Pơ ma tơ̆ hop akŏm trư̆k tuyê̆n lơ̆m tĕh đak hŏk pơ hrăm, hlôh vao tơ drong tơ chơ̆t kơ sô̆ 19 đơ̆ng Khul kơ dră chĕp kơ̆l Trung ương Đảng jăl 13 găh choh jang xa, kon pơ lei jang chŭn mir, tơ ring tơ rang đơ̆ng dang ei truh sơ năm 2030, Kơ dră tơm vei lăng choh jang xa păng atŏk tơ iung tơ ring tơ rang Lê Minh Hoan pơ ma hơ dăh: lơ̆m tơ drong pơ vei đơ̆ng choh jang xa, kon pơ lei jang chŭn mir, tơ ring tơ rang athei chih hơ dăh hơ năp jang, anih dơ̆ng pơm tơ ‘ngla đơ̆ng kon pơ lei jang chŭn mir vă gơ̆h jang đei tơ drong atŏk tơ iung choh jang xa, tơ ring tơ rang. Dôm anih jang găh Anih tơm păng găh anih vei lăng choh jang xa păng atŏk tơ iung tơ ring tơ rang tơ̆ dêh char athei hlôh vao kơ jăp, bơ̆ jang ‘lơ̆ng dôm trong jang atŏk tơ iung choh jang xa kơ jăp ‘lơ̆ng kiơ̆ đơ̆ng dôm tơ drong jang mă rơ đăh vă bơ̆ jang đei tơ drong tơ chơ̆t găh choh jang xa, kon pơ lei jang chŭn mir, tơ ring tơ rang:

        “Tơ drong jang tơ ƀôh hơ dăh dôm tơ drong vă jang đơ̆ng Khul kơ dră tĕh đak jang kiơ̆ tơ drong tơ chơ̆t. Tơ drong tơ chơ̆t dăh mă trong vă jang tơ tă đei lơ̆m tơ drong bơ̆ jang ngăl. Vă jang đei tơ drong ‘nâu, dôm anih jang kơ Anih tơm păng tơ ring athei tơ lĕch jang mă pran, tơ plih ‘nao đon tơ chĕng lơ̆m trong pơ gơ̆r bơ̆ jang”.

Choh jang xa lơ̆m lơ sơ năm hloi đei pơ ma truh nhen thoi 1 pôm jrăng tơ jră tơm ăn tơ drong jang mŭk drăm. Tơ drong jơ nei đơ̆ng choh jang xa, kon pơ lei jang chŭn mir, tơ ring tơ rang vang tơ gop ăn dôm tơ drong jơ nei tih tên, gĭt kăl lơ̆m jơ hnơr arih đơ̆ng tơ drong jang tơ plih ‘nao hlôi iŏk đei khei ‘năr âu ki. Trong jang năm truh Choh jang xa rơ gŏh, tơ ring tơ rang ‘nao ‘lơ̆ng, kon pơ lei jang chŭn mir rơ gei mă Hop akŏm mă XIII tơ lĕch, athei hơ tŏk hlŏh dơ̆ng lơ trong jang, tơ drong tơ gŭm ‘nao pran ‘lơ̆ng vă atŏk tơ iung tơ drong choh jang xa, kon pơ lei jang chŭn mir păng tơ ring tơ rang.

Dơ̆ng: Tơ blơ̆