VOV4.Bahnar - Kơ jă phŏng, tơmam hiĕm kon tơrong adoi nhen kon tơrong tŏk măt pơm ăn lơ kon pơlei chŏh jang sa Dak Lăk tơ ƀơ̆p tơnap tap lơ̆m tơmơ̆t jên jang chŏh jang sa. Mă lei, tơ̆ lơ tơring, hơnĭh mơdro sa hlôi “hơmet” kơ dĭh hăm pơgĕnh iŏk dôm kơđŏh chĕhphe, hơnong au to vă ŭh phŏng mơ̆r pơm nơ̆r chă tŭh ăn ‘long pơtăm vă dă ƀiơ̆ tơhoach kon jên jang sa.

Ƀok Đỗ Hữu Minh iŏk ĭch tơpai rong hoăr

Ƀok Đỗ Hữu Minh ở thôn Tân Phú, tơring Ea Nuôl, apŭng Buôn Đôn đei hlŏh 2 ha chehphe, tiu păngc hăm pơtăm hrau mĭnh ƀar ‘long sa plei. Ƀok tơbăt, mĭnh sơnăm ŭnh hnam tơlĕch đơ̆ng 35-40 trĭu hlak jên răt phŏng. Mư̆h kơ jă phŏng tŏk măt, ƀok chă iŏk kơđŏh plei chĕhphe, bơ̆n hơ ie tiu, kam ƀa vă pơm phŏng tŭh ăn ‘long pơtăm. Hlŏh mĭnh sơnăm au ƀok chă ŭh lơ lau pơm ăn tĕh jing ‘lơ̆ng, adoi vei lăng rơgŏh cham char păng dă ƀiơ̆ tơhoach kon jên jang dơ̆ng:“ Sơ̆ chă prôi phŏng NPK, phŏng hoă hŏk mă lei dang ei đĭ đăng tŭh hăm mơ̆r ngăl. Mơr vi sinh đơ̆ng kơ dĭh ba pơm tơlĕch đơ̆ng chă ŭh rim kơđŏh chehphe au to đei jing mơ̆r tôch hơ iă. Găh phŏng lơ̆m 1 sơnăm 1 ‘măng hăm kơ jă 35 trĭu hlak jên mă lei dang ei ŭh mơ̆r vi sinh lăp đơ̆ng 4-5 trĭu hlak jên tŭh ăn 2 ha bơih”.

Kơđŏh chehphe đei kon pơlei ŭh pơm mơ̆r

Hăm Hơp tak xah Chŏh jang sa păng Tơmang pơ hiơ̆ Phú Nông Buôn Đôn, apŭng Buôn Đôn, ‘nŏh tơdrong iŏk yua bơ̆n kơđŏhchehpeh au to vă pơm tơlĕch phŏng mơ̆r tŭh ăn ‘long pơtăm hlôi đei rim bơngai lơ̆m Hơp tak xah jang ‘lơ̆ng hơ iă. Trong chŏh jang sa hơlơ̆k hơle mă đĭ đăng dôm tơmam hut vĭh hơlơ̆k pơm mơ̆r tŭh ăn ‘long pơtăm, Ƀok Trần Văn Toàn, Kơdră chĕp pơgơ̆r Hơp tak xah tơbăt, trong jang hơlơ̆k hơle pơjing đei tơmam drăm ‘lơ̆ng, rơgŏh, dă ƀiơ̆ tơhoach păng mă kăl pơm dă ƀiơ̆ kơtang ‘mê̆ ‘mach ăn cham char: “ Vă pơm dă ƀiơ̆ tơhoach lơ kon jên tơmơ̆t jang ‘nŏh rim ĭch kon tơrong gơ̆h chă rong hoăr vă hiĕm ăn iĕr, bip, ka sa pơm dă ƀiơ̆ tơhoach lơ kon jên răt tơmam drăm hiĕm. Hơdrin chă pơtho ăn kon pơlei jang sa kiơ̆ trong jang dăr hơlơ̆k hơle au gô pơm dă ƀiơ̆ tơhoach lơ kon jên tơmơ̆t jang, jang sa iŏk yua kơ jăp mư̆h dôm tơmam drăm bơ̆n jang sa đei ‘lơ̆ng ngăl”

Chŏh jang sa dăr hơlơ̆k hơle jei jing trong jang mă lơ hơnĭh mơdro sa tơ̆ Dak Lăk iung jang kiơ̆ tơ̆ hơnăp “kơ jă tŏk măt kơtang” kơ phŏng, adoi yak trŭh mĭnh trong chŏh jang sa rơgŏh ‘lơ̆ng, dă ƀiơ̆ iŏk yua phŏng, pơgang vei lăng ‘long pơtăm. Ƀok Phạm Hữu Thời, Kơdră chĕp pơgơ̆r Kŏng ty Chŏh jang sa Thống nhất, hơnĭh joăt pơm tơlĕch, tĕch mơdro tơ̆ tĕh đak đe tơmam drăm choh jang sa ‘lơ̆ng, tơbăt: “ Chŏh jang sa hăm mơ̆r ‘nŏh chŏh jang sa dăr kơna nă ƀiơ̆ đei ƀơm kơnê̆ đơ̆ng kơ jă phŏng tŏk măt. Kơ yuơ lơ̆m chŏh jang sa jei đei pơjing hloi bơ̆n mơ̆r, tơmam hiĕm kơtă păng jei trŏ lăp hăm tơdrong pơkăp ‘lơ̆ng lơ̆m trong pơkăp mơ̆r ‘nŏh pơjing đei tơmam ‘lơ̆ng ăn mir pơgar tŏ sĕt hlŏh jơnei 50% ăn tơdrong rong kon tơrong adoi nhen mơ̆r vă chă tŭh ăn ‘long pơtăm”.

Dak Lăk jing dêh char jang sa lơ tơdrong, kơna iă tơmam drăm jang sa jĭ tôch kơ lơ. ‘Nau jing jơ rơvơn vă atŏk tơ iung chŏh jang sa kơ jăp ‘lơ̆ng kiơ̆ trong jang sa dăr. Trong chŏh jang sa dăr pơjing đei tơmam drăm ‘lơ̆ng, rơgŏh, dă ƀiơ̆ pơm ‘mê̆ ‘mach cham char. Mă kăl lơ̆m khei năr phŏng măt nhen hrei au, tơdrong pơgĕnh iŏk dôm iă chŏh jang sa vă pơm tơlĕch đei tơmam kơ yua ăn chŏh jang sa nai gô pơ  kom tôch kơ lơ kon jên tơmơ̆t jang.

Bơngai chĭh: Hương Lý

Tơblơ̆ nơ̆r: Amazưt