VOV4.Bahnar - Hăm tơ drong tơm ‘mĕh chă đei trong hơ met pơ ‘lơ̆ng tơ hlăk tăk tơ gŭm ăn tơ drong akŏm chŭn na choh pơm kơ dơ chŭn xă tơ̆ dêh char đei bơ̆ jang pran ‘lơ̆ng, lăp hăm yăn âu, ‘năr 20/9, tơ̆ apŭng Kon Brăih, Grŭp dôm Khul jang Khoa hŏk păng ki thuơ̆t dêh char Kon Tum jang hơ doi hăm Anih vei lăng choh jang xa păng atŏk tơ iung tơ ring tơ rang dêh char, Anih vei lăng tơ mam drăm cham char kơ dêh char, Dơ nŏ anih vei lăng kon pơ lei apŭng Kon Rẫy pơ gơ̆r hop akŏm khoa hŏk “Akŏm tĕh, chŭn na vă pơ jing kơ dơ chŭn xă” tơ̆ dêh char Kon Tum.

Jơ Hop akŏm

18 ƀai chih tơ blang kŭm hăm lơ nơ̆r tơ gop lơ̆m jơ pơ ma nuh tơ̆ Hop akŏm hlôi pơm hơ dăh tơ drong đei yoa đơ̆ng akŏm tĕh chŭn na vă pơ jing kơ dơ chŭn xă tơ̆ dêh char Kon Tum. Atŭm hăm ‘nŏh tơ blang hơ dăh, tơ lĕch trong jang vă hơ met pơ ‘lơ̆ng dôm tơ drong tơ hlăk tăk mưh bơ̆ jang nhen: Tơ drong akŏm tĕh ‘nao dơ̆ng ƀât jang xa hơ doi đĕch, tam mă pơm kiơ̆ trong tơ prŏh jang, hơ met ming chŭn na vă pơ jing kơ dơ chŭn xa, jang xa tih; kon pơ lei oei hli hiong tĕh; Tơ drong tơ mât yoa kơ măy kơ mŏk ‘nao lơ̆m tơ drong choh jang xa tam mă pran ‘lơ̆ng…

Dơ̆ng: Tơ blơ̆