Hơnih vei lăng Rong kon tơrong păng Hơnih jang pơgang vei lăng kon tơrong dêh char Kon Tum hlôi ăn mĭnh Kơ iĕng Kơdră chĕp pơgơ̆r păng 5 ‘nu kang ƀô̆ kih thuơ̆t năm truh 2 tơring: Xốp, Đăk Nhoong tơgŭm ăn khul bơ̆ jang apŭng Đak Glei iung jang tang găn pơrang jĭ, adoi pơtho ăn kon pơlei vei lăng năng tông, ming hơmet kơpô, rơmo jĭ. Atŭm hăm ‘noh, Hơnih vei lăng Rong kon tơrong păng Hơnih jang pơgang vei lăng kon tơrong dêh char Kon Tum hlôi ƀơk ăn apŭng Đak Glei 300 kơlich đak pơgang, 2.500 kơliu vaccine vă ƀet bơ̆ng ăn kon tơrong tơ̆ rim pơlei: Đăk Nhoong, Đăk Ung, tơring Đăk Nhoong păng thôn Xốp Nghét, tơring Xốp tơpoh lang să tơ̆ ‘ngoăih. Ƀok Ưng Văn Thanh, Kơdră chĕp pơgơ̆r Hơnih vei lăng Rong kon tơrong păng Hơnih jang pơgang vei lăng kon tơrong dêh char Kon Tum tơbăt: Dôm tơring ƀôh đei pơrang jĭ ‘noh pơtho ăn kon pơlei găh vei lăng năng tông, ming hơmet. Khul kơdră tơring tơtơ̆p kơƀang tơroi tơbăt tơring đei pơrang jĭ vă kon pơlei hoei chă tĕch răt, chơ tơlĕch kon tơrong năm tơ̆ nai, ưh kơ gơ̆h mơ̆t lơ̆m tơring đei pơrang jĭ. Hơnơ̆ng lơ̆m mĭnh giĕng, mĭnh năr chă pruih pơgang pơlôch sơmach mĭnh ‘măng.