Dôm năr blŭng mât lơ̆m pơ yan phĕ chĕh phe sơ năm 2022-2023, kơ jă iŏk bơ ngai phĕ 1 tă chĕh phe hơ drih tơ̆ apŭng Đăk Hà, dêh char Kon Tum jur tŏk đơ̆ng 90.000 truh 100.000 hlak. Hăm dôm pơ gar chĕh phe ưh đei plei lơ, athei năm hơ tăih, trong ưh ‘lơ̆ng kơ jă phĕ 1 tă đơ̆ng 100.000 hlak jên tŏk tơ̆ kơ pal.

Bơ ngai jang đơ̆ng dêh char nai truh tơ̆ apŭng Đăk Hà, dêh char Kon Tum chă phĕ chĕh phe ăn đe

Đăk Hà jĭ tơ ring pơ tăm chĕh phe xă hlŏh tơ̆ Kon Tum, hăm hlŏh 15.000 ha đei plei. Vă phĕ đĭ pơ gar chĕh phe âu, Đăk Hà kăl đei truh 15.000 ‘nu bơ ngai jang. Khul jang kơ tă tơ̆ apŭng lăp đei dang 11.000 ‘nu, 4.000 ‘nu bơ ngai jang oei đei dơ̆ng gô mơ̆ng bơ ngai jang đơ̆ng dêh char nai truh.