VOV4.Bahnar - Jang kiơ̆ nơ̆r athei đơ̆ng Dơnŏ anĭh vei lăng kon pơlei dêh char Kon Tum găh tơgŭm djru kon pơlei pơtăm sâm Ngŏk Linh hơmet pơ ‘lơ̆ng hiong răm đơ̆ng pơrang jĭ pơrăm, Dơnŏ anĭh mong jên Tơgŭm djru tơpôl dêh char Kon Tum tŏk bŏk dăr lăng hơlen tơdrong hiong răm kơ rim ŭnh nam vă đei trong tơgŭm ăn.

Mĭnh dơnơm sâm Ngŏk Linh răm pơrang pơrăm

Hrei au tơ̆ apŭng Tu Mrông păng Đak Glei đei 953 ŭnh hnam kon pơlei tŏk iŏk jên vă tơmơ̆t jang pơtăm sâm Ngŏk Linh hăm akŏp kon jên tŏk iŏk hlŏh 62 ti hlak jên. Kiơ̆ dăr lăng ‘măng mă blŭng đơ̆ng Hơnĭh mong jên, tơ̆ apŭng Tu Mrông, ŭnh hnam đei sâm Ngŏk Linh lôch ‘nŏh 87 ŭnh hnam hăm akŏp kon jên hre 6 ti hlak jên. Tơ̆ apŭng Đak Glei ŭnh hnam đei sâm Ngŏk Linh lôch ‘nŏh 9 ŭnh hnam hăm kon jên hre 380 trĭu hlak jên. Dơnŏ anĭh mong jên tơgŭm djru tơpôl dêh char Kon Tum tŏk bŏk iung jang hơdoi hăm kơdră tơring 2 apŭng hơlen hơdăh tơdrong hiong răm vă đei trong tơgŭm djru ăn kon pơlei. Kiơ̆ kơ ‘nŏh, gô pơđunh khei ‘năr ăn hre tơdăh tơdrong hiong răm vă jê̆ 40%; pơđunh ăn hre 3 sơnăm hăm dôm ŭnh hnam hiong răm đơ̆ng 40% trŭh 80%. Pơđunh ăn hre 5 sơnăm hăm tơdrong hiong răm trŭh 80%.

Tơblơ̆ nơ̆r: Amazưt