VOV4.Bahnar - Jô̆ truh đĭ khei 9 âu ki dêh char Kon Tum hlôi pơ tăm ‘nao đei hloh 4.700hek tar bri yak hloh trong tơ lĕch jang tơ lĕch ăn lơ̆m sơ năm ‘nâu. Kơ tơ̆ng ang đơ̆ng Anih vei lăng bri ‘long dêh char Kon Tum ăn ƀôh, jô̆ truh đĭ khei 9 âu ki dôm tơ ‘ngla bri, anih jang, tơ ring lơ̆m dêh char hlôi pơ tăm hloh 4.700hek tar bri, yak hloh 200hek tar pơ têng hăm trong tơ lĕch đơ̆ng dêh char tơ lĕch ăn lơ̆m sơ năm ‘nâu. Lơ̆m noh 5 apŭng, pơ lei tơm pơ tăm bri yak hloh tơ drong hơ găt tơ lĕch pơ jao ăn, ‘noh: Sa Thầy, Đăk Hà, Đăk Glei, Kon Rẫy păng pơ lei tơm Kon Tum.

Bri ‘long pơ gang pơ tăm tơ̆ xăh Đăk Kan, apŭng Ngọc Hồi, dêh char Kon Tum

Dôm kơ loăi ‘long bri đei dêh char Kon Tum pơ tăm găh lơ ‘noh jĭ hơ ngo pêng hla, ‘long pơ gang, ‘long kơ lăng...Ƀok Nguyễn Văn Nam, Phŏ kơ dră Anih vei lăng bri ‘long dêh char Kon Tum tơ băt: Tơ drong jang vei lăng vă hoei kơ đei ŭnh sa bri nhen vei lăng vă hoei kơ đei hơ drông, tơ drong jĭ ‘noh jĭ 2 hơ năp jang mă khei ‘năr tơ̆ hơ năp kơnh khŭl jang vei lăng bri ‘long athei hơ drin bơ̆ jang kiơ̆. Khŭl kơ dră xăh, phường athei hơ drin tơ gŭm, mơ̆t jang păng vang hơ dai hăm khŭl jang vei lăng bri ‘long vă hơ dai hăm kon pơ lei, vă hơ nơ̆ng pơ tho, tơ tă, krao hơ vơn kon pơ lei vei lăng đei yua.

VOV Tây Nguyên/Thuem tơ blơ̆