Năm truh ‘măng tơbăt 94 sơnăm năr pơjing Khul drŏ kăn Việt Nam păng Năr Drŏ kăn Việt Nam 20/10, ‘năr brei (8/10), tơ̆ plt Kon Tum, Khul drŏkăn dêh char Kon Tum pơgơ̆r Năr drŏ kăn iung jang xa păng pơtôch tơdrong thi drŏ kăn iung jang xa sơnăm 2024 hăm hơnăn “Drŏ kăn Kon Tum tơiung tơmam kơtă tơ̆ tơring păng jang xa rơgoh”. Vang thi đei 48 đon tơchĕng, lơ̆m noh 28 đon tơchĕng vang thi iung jang xa tơ̆ dêh char, 20 đon tơchĕng vang thi tơ̆ Trung ương.

Hăm tơdrong jang, pơm tơlĕch tơmam xa đơ̆ng plei ‘long, ‘nhot, ƀum păng pơgang ‘long rơgŏh tơ̆ Kon Tum, tơdrong vă jang đơ̆ng mŏ Nguyễn Thị Minh Ngọc, Khul drŏ kăn xăh Đăk Hring, apŭng Đăk Hà iŏk đei yaih như̆k lơ̆m tơdrong thi. Anih pơgơ̆r tơdrong thi oei hơpăh 1 yaih 2; 2 yaih 3 păng 6 yaih pơčhơp jơhngâm ăn dôm tơdrong vă iung jang xa đei lơ tơdrong hơmĕng. Vă bơ̆ jang đei dôm đon tơchĕng, tơdrong vă iung jang xa đơ̆ng bơngai jang, Khul drŏ kăn dêh char Kon Tum pơma nuh hăm Anih mong jên tơgŭm tơpôl tơgŭm ăn 28 đon tơchĕng tŏk iŏk jên hăm jên kon tŏ sĕt, hăm kơsô̆ jên truh 7 ti.