Vă hơtŏk pran tơdrong jang hadoi hơlen, ƀa trui, tang găn păng xek tơlang tơtôm tơdrong pơrăm mŭk drăm bri, kơsơ̆ 'năr brei (28/10), tơ̆ pơlei tơm Kon Tum, Anih vei lăng kon pơlei dôm dêh char Kon Tum - Quảng Nam - Quảng Ngãi pơgơ̆r Hop akŏm xơkơ̆t tơdrong pơm kiơ̆ Pơkăp jang hadoi vei lăng bri tơ̆ tơring tơkuh băl  kơ 3 dêh char.  

Kĭ Pơkăp jang hadoi vei lăng bri 3 dêh char

Pơm kiơ̆ Pơkăp jang hadoi vei lăng bri tơring tơkuh băl đei 3 dêh char kĭ pơkăp, hloh 2 xơnăm kơ âu khul jang vei hơlen bri kơ 3 dêh char hlôi tơlĕch 1.200 'măng chă hơlen, ƀa trui dôm bơngai pơm glăi truh mŭk drăm bri, ƀôh păng chih pơkăp hla bar đei 98 'măng pơm glăi. Ƀok Hồ Quang Bửu, Phŏ Kơdră Anih vei lăng kon pơlei dêh char Quảng Nam xơkơ̆t, khei năr âu ki rim khul kơpal kơ 3 dêh char hlôi jang atŭm tơnăp lơ̆m tơdrong vei lăng bri tơ̆ tơring tơkuh băl. Tơ̆ hop akŏm, 3 dêh char hlôi kĭ dơ̆ng Pơkăp jang hadoi vei lăng bri tơ̆ tơring tơkuh băl hăm dôm tơdrong jang hơdăh vă hơtŏk vei lăng bri lơ̆m khei năr truh.