VOV4.Bahnar - Kiơ̆ Anih vei lăng choh jang xa păng atŏk tơ iung tơ ring tơ rang dêh char Lâm Đồng, choh jang xa rơ gei ‘nŏh jĭ hơ yak tŏk roi kơ jung ƀiơ̆ đơ̆ng choh jang xa hăm kơ măy kơ mŏk ‘nao, kiơ̆ đơ̆ng tơ mât lơ̆m mang IoT, vei lăng kơ dih rim tơ drong mư̆h choh jang xa.

Trong choh jang xa rơ gei hơ nhăk ăn iŏk yoa lơ tơ̆ Lâm Đồng

Kiơ̆ khei ‘năr bơ̆ jang kiơ̆ trong choh jang xa rơ gei, dêh char Lâm Đồng hlôi jang đei dang 400ha, tơ gŭm ăn kon pơ lei jang chŭn mir, HTX, anih tĕch mơ dro tơ mam choh jang xa tơ jră ‘lơ̆ng ƀiơ̆ hăm tŏ phang, tang găn ‘lơ̆ng pơ rang jĭ phă; hơ tŏk tôch ai tơ drong đei yoa.

Ƀok Nguyễn Văn Châu, Phŏ Kơ dră Anih vei lăng choh jang xa păng atŏk tơ iung tơ ring tơ rang dêh char Lâm Đồng ăn tơ băt, atŏk tơ iung choh jang xa rơ gei ‘moi kiơ̆ tơ drong choh jang xa hăm kơ măy kơ mŏk ‘nao pơm ăn kơ jă tơ mam jang đei tŏk tôch lơ.

VOV Tây Nguyên - Dơ̆ng tơ blơ̆