Vă vei xơđơ̆ng pơyua ăn bơngai yua, tơgop hơmet pơ 'lơ̆ng tơdrong pơkăp hơnăn yăh 'nhot plei 'long VietGAP vă axong ăn dôm siu thĭ, kơchơ tĕch lơ̆m teh đak, Lâm Đồng tŏk bŏk hơtŏk hơlen, kơhret tơdrong vei hơlen tơm a hla chă tơmam choh pơtăm đei lơ̆m tơring.

Lâm Đồng đei hloh 5.700ha teh pơtăm ‘nhot plei ‘long xa kiơ̆ pơkăp VietGAP

Lâm Đồng dang ei đei hloh 5.700 ha hơgăt teh choh pơtăm kiơ̆ pơkăp VietGAP, tŏk jê̆ 320 ha hơgăt choh jang kiơ̆ pơkăp VietGAP pơtêng hăm xơnăm xơ̆. Kiơ̆ kơ ƀok Nguyễn Hà Lộc, Phŏ Kơdră Anih Choh jang xa Hơtŏk tơring pơxĕl dêh char Lâm Đồng, khei năr tơjê̆ âu đei tơroi tơmam drăm 'nhot akŏm tơ̆ kơchơ tơm, mă lei đang kơ noh đei 'nŭng, pơklep hơnăn VietGAP păng pơtruh tĕch tơ̆ dôm siu thĭ tơ̆ pơlei tơm HCM. Tơdrong mă âu pơrăm truh jơhngơ̆m jăn, tơdrong pơyua ăn bơngai răt yua păng đon lui hăm hơnăn 'nhot Đà Lạt - Lâm Đồng. Anih Choh jang xa tơ̆ tơring hlôi hơtŏk pran dôm tơdrong chă hơlen kơjăp dôm tơdrong pơm tơlĕch tĕch pơdro tơmam choh pơtăm VietGAP lơ̆m tơring, khŏm mă xek tơlang keh đang dôm tơmam drăm VietGAP ưh đei 'lơ̆ng rơgoh.