VOV4.Bahnar - Vă vei sơ đơ̆ng hơ tŏk đei yua pơm tơ lĕch, hơ tŏk tơ mam choh jang sa lơ̆m khei ‘năr ƀơm ưh kơ ‘lơ̆ng đơ̆ng jĭ Covid-19, dêh char Lâm Đồng tŏk bŏk akŏm tŭn pran tơ drong jang hơ dai pơm tơ lĕch, tĕch tơ mam đơ̆ng choh jang sa ăn kon pơ lei. Lâm Đồng dang ei đei hloh 180 tơ drong jang hơ dai pơm tơ lĕch tơ klep hăm tĕch dôm tơ mam choh jang sa hăm vă jê̆ 18.400 ŭnh hnam kon pơ lei vang jang. Gơ nang đơ̆ng tơ drong jang hơ dai âu, 520 rơ bâu tấn tơ mam choh jang sa rim kơ loăi đơ̆ng kon pơ lei jang chŭn mir lơ̆m sơ năm âu ki hlôi sơ đơ̆ng găh anih răt iŏk.

Lâm Đồng tŭn pran hơ tŏk tơ iung rim tơ drong jang hơ dai pơm tơ lĕch păng tĕch tơ mam đơ̆ng choh jang sa

Dêh char Lâm Đồng tơ lĕch ăn tơ drong hơ găt hơ tŏk lơ kơ sô̆ tơ drong jang hơ dai pơm tơ lĕch tŏk 200 tơ drong jang lơ̆m sơ năm ‘nâu, hăm tơ drong vang jang đơ̆ng hloh 20.000 ŭnh hnam kon pơ lei jang chŭn mir păng tơ mam choh jang sa tĕch đei hloh 600.000 tấn. Vă iŏk đei tơ drong hơ găt âu, dêh char gô akŏm tơ lĕch jang lơ tơ drong jang tơ gŭm vă hơ tŏk tơ iung rim tơ drong jang hơp tak xăh, anih jang mơ dro sa iĕ păng păh lăp, hơ nơ̆ng tơ gŭm kon pơ lei jang chŭn mir tơ mơ̆t yua dôm trong jang choh pơ tăm hơ gei hơ tŏk ‘lơ̆ng tơ mam đơ̆ng choh jang sa.

Thuem: Tơ blơ̆