VOV4.Bahnar - Tơ̆ apŭng Krông Pach, dêh char Dak Lak ‘nao đei phŭt huơ̆r tơ păk lơ tơm ‘long sâu riêng. Phŭt huơ̆r đei lơ̆m gơ măng 16/6, tơ̆ thôn 19 - 5 păng 1 păh plei Tân Lập, xăh Ea Yông.

Phŭt huơ̆r păk kơ hrĕng tơ nơm ‘long sâu riêng tơ̆ Dak Lak

Dang ei đe kăn ƀô̆, bơ ngai jang tơ̆ Anih choh jang xa păng atŏk tơ iung tơ ring tơ rang apŭng oei jang hơ doi hăm Dơ nŏ anih vei lăng kon pơ lei xăh Ea Yông pơ gơ̆r jô̆ hơ len tơ drong hiong răm, tơ roi ăn Dơ nŏ anih vei lăng kon pơ lei apŭng vă đei trong tơ gŭm ăn kon pơ lei.

Kiơ̆ hla ar chih tơ roi tam mă tôm, đei 250 tơ nơm ‘long sâu riêng păk, hiong răm dang 400 tân plei. Tơ̆ plei Tân Lập đei 2 tŏ hnam păr bơ bŭng, lơ ‘long sâu riêng păk tơ gơ̆, hơ lŭng ruh dang 10 tân plei. Akŏm đĭ đăng hiong răm dang 10 ti hlak jên.

Dơ̆ng: Tơ blơ̆