VOV4.Bahnar - Năr 17/9 au ki, tơ̆ apoŭng Krông Pach, dêh char Dak Lăk pơgơ̆r Pơm lêh tơbăt hơdăh tĕch mơdro tơ̆ tĕh đak đe plei sâu riêng mă blŭng kiơ̆ Tơdrong Tơchơ̆t kĭ pơkăp ƀar păh Dơnŏ anĭh vei lăng Chŏh jang sa păng Atŏk tơ iung tơring tơrang Việt Nam păng Hơnĭh tơm vei lăng Tơmam drăm tĕch mơdro hăm tĕh đak đe Trung Quốc. Tơdrong au pơjing đei rơvơn tĭh tên ăn hơnĭh jang sâu riêng kơ Việt Nam kiơ̆ trong tơpăt năm tơ̆ tĕh đak răt iŏk lơ hlŏh lơ̆m apŭng plĕnh tĕh.

Ƀok Lê Minh Hoan năm tơmang tơring pơtăm sâu riêng hlôi đei ƀơk ăn mã tơring pơtăm tơ̆ apŭng  Krông Pach, dêh char Dak Lăk

Plei sâu riêng mă blŭng tĕch mơdro tơpăt tơ̆ tĕh đak đe kiơ̆ Tơdrong tơchơ̆t kĭ pơkăp ƀar păh Dơnŏ anĭh tơm vei lăng Chŏh jang sa păng Atŏk tơ iung tơring tơrang Việt Nam păng Hơnĭh tơm vei lăng Tơmam drăm tĕch mơdro hăm tĕh đak đe Trung Quốc ‘nŏh hlŏh 300 tân đơ̆ng dêh char Dak Lăk. ‘Nau dêh char đei hơgăt tĕh pơtăm ‘long sâu riêng să hlŏh dơ̆ng mă 2 lơ̆m tĕh đak (dơ̆ng đơ̆ng rŏng dêh char Tiền Giang) hăm dang 15.000ha, lơ̆m sơnăm 2022 gô phĕ iŏk đei dang 170.000 tân.

Ƀok Y Giang Gry Niê Knơng, Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char Dak Lăk chơt hơ iă tơbăt, hrei au, dêh char đei Dơnŏ anĭh vei lăng tơmam drăm tĕch mơdro hăm tĕh đak đe kơ Trung Quốc kĭ tơchơ̆t 4 mã hơnĭh tăh ‘nŭng plei sâu riêng păng 23 mã kơsô̆ tơring pơtăm (tơmơ̆t vă jê̆ mĭnh poăt mã kơsô̆ tơring pơtăm lơ̆m tĕh đak đe kĭ pơkăp). Hăm tơdrong kơrŭn đĭ ai đơ̆ng Dơnŏ anĭh tơm vei lăng Chŏh jang sa păng Atŏk tơ iung tơring tơrang Việt Nam lơ̆m pơma đam, iŏk đei jơnei au tơƀô̆h hơdăh dôm tơdrong hơdrin tĭh tên đơ̆ng khŭl kon pơlei chŏh jang sa, hơnĭh mơdro sa lơ̆m tơring: "Vă dôm plei sâu riêng mă blŭng tĕch mơdro tơpăt tơ̆ tĕh đak đe đei tơbăt hơdăh lơ̆m Pơm lêh năr au ‘nŏh rim tơring pơtăm, hơnĭh tăh ‘nŭng plei sâu riêng hlôi hơmet ăn păng yak hlŏh ‘măng lơ ‘măng dăr lăng hơlen đơ̆ng hơnĭh bơ̆ jang kơ ƀar tĕh đak, trŏ lăp hăm tơdrong rơgŏh ‘lơ̆ng, jang kiơ̆ ƀlep trong tơlĕch jang tăh ‘nŭng păng sơđơ̆ng ăn tơchă băt tơm a la chă."

‘Măng chơ tĕch mơdro plei sâu riêng kơtă tơ̆ tĕh đak đe ‘măng mă blŭng kơ Việt Nam

Iung pơma tơ̆ pơm lêh, Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang Việt Nam Lê Minh Hoan sơkơ̆t hơdăh, Tơdrong tơchơ̆t găh pơkoĕl lăng hơlen ‘long pơtăm đei kĭ pơkăp lơ̆m năr 11/07/2022 ƀar păh Dơnŏ anĭh tơm vei lăng Chŏh jang sa păng Atŏk tơ iung tơring tơrang Việt Nam păng Hơnĭh tơm vei lăng Tơmam drăm tĕch mơdro hăm tĕh đak đe Trung Quốc ‘nŏh tơdrong iŏk đei jơnei đơ̆ng hơdrin đĭ ai pơma đam prăt khei ‘năr đunh đai kơ rim hơnĭh bơ̆ jang kơ ƀar păh. Atŭm hăm ‘nŏh tơdrong yak hơdrin kơtang đơ̆ng tơpôl dôm bơngai jang pơtăm păng tĕch mơdro tơ̆ tĕh đak đe plei sâu riêng Việt Nam.

        Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang Việt Nam pơma hơdăh, tơdrong tĕch mơdro tơpăt tơ̆ tĕh đak đe mă blŭng kơ plei sâu riêng au ‘nŏh jing tơdrong chơt hơ iă atŭm kơ kon pơlei tơring Tây Nam Bộ, Đông Nam Bộ păng Tây Nguyên. ‘Nau jing mĭnh tơdrong pơgơ̆r tôch gĭt kăl kơ yuơ Trung Quốc ‘nŏh tĕh đak răt iŏk plei sâu riêng lơ hlŏh lơ̆m apŭng plĕnh tĕh. Atŭm hăm tơdrong rơvơn tĕch mơdro tơ̆ hơnĭh tĕch răt tĭh tên, tơgŭm ăn hơnĭh mơdro sa păng kon pơlei iŏk đei jơnei kơ jăp hlŏh dơ̆ng đơ̆ng plei ‘long gĭt kăl au, tĕch mơdro tơpăt tơ̆ tĕh đak đe jei pơlăp ăn lơ tơdrong long kơ yuơ rim tơdrong pơkăp lơ̆m Tơdrong tơchơ̆t ‘nŏh rim tơdrong pơkoĕl găh kih thuơ̆t athei bơngai jang pơtăm, tăh ‘nŭng păng tĕch mơdro tơ̆ tĕh đak đe plei sâu riêng kăl pơm kiơ̆ kơ jăp. Ƀok Lê Minh Hoan sơkơ̆t hơdăh: "Lơ̆m khei ‘năr chŏh jang sa rơgŏh ‘lơ̆ng, mŭk drăm tơgoăt hrei au, jơhngơ̆m đon tơchĕng “Yak hơdoi” ‘nŏh kăl hlŏh. Plei sâu riêng dăh mă mĭnh tơmam drăm chŏh jang sa ayơ ‘mĕh vă yak hơtăih, pơjing đei hơnĭh tĕch mơdro hlot hơnơ̆ng, ‘nŏh rim bơngai lơ̆m khŭl jang sa kơdro sa kăl vang kơrŭn jơhngơ̆m, jang hơdoi dĭh băl vă iung yak.”

        Kiơ̆ đơ̆ng Hơnĭh tơm vei lăng Chŏh pơtăm, hơgăt tĕh pơtăm sâu riêng lơ̆m tĕh đak dang ei đei vă jê̆ 90.000ha, hăm phĕ iŏk đei lơ̆m sơnăm dang 1 trĭu 300.000 tân plei, đei pơtăm să tơ̆ Đông Nam bộ, Tây Nguyên păng Tơring Tơmăn đak kroong Cửu Long. Plei sâu riêng kơ Việt Nam đei lăng jing ‘lơ̆ng hlŏh. Tơdrong đei tĕch tơpăt tơ̆ tĕh đak đe ‘nŏh jing rơvơn tĭh tên hlŏh hăm plei sâu riêng păng hơnơ̆ng gô đei rơvơn lơ̆m pơma đam hơlen hơdăh vă pơ̆ih să hơnĭh tĕch răt tơmam drăm chŏh jang sa anai kơ Việt Nam lơ̆m khei năr kơnh.

Bơngai chĭh: Công Bắc

Tơblơ̆ nơ̆r: Amazưt