Tơdrong ou gô đei pơgơ̆r lơ̆m pơgê năr17/8 tơ̆ kơsô̆ hnam 498 trong Hoàng Quốc Việt, phương Cổ Nhuế, kuân Bắc Từ Liêm, Hà Nội. Rim tơnô̆ chehphe gĭt kăl đei pơgơ̆r tơchă bơngai răt ‘măng mă ou ‘noh dôm kơ loăi chehphe ‘lơ̆ng đei rơih hơlen đơ̆ng ‘măng pơlong Chehphe gĭt kăl Việt Nam 2024 (Vietnam Amazing Cup 2024). Lơ̆m ‘măng mă ou, gô đei 9 tơnô̆ chehphe Robusta păng 6 tơnô̆ chehphe Arabica đei tơlĕch tơchă bơngai răt. Mĭnh hơnih đei chehphe pơgơ̆r tơchă bơngai răt gô tơroi tơbăt hơdăh dôm tơdrong đơ̆ng mir pơgar jang chehphe ‘noh, đơ̆ng tơdrong pơm hơtŏk ‘lơ̆ng chehphe Việt Nam pơjing đei dôm kơchŏk đak chehphe ‘lơ̆ng hloh ăn bơngai răt yoa. ‘Nou ‘măng mă ƀar dêh char Dak Lăk pơgơ̆r ‘măng tơchă bơngai răt rim tơnô̆ chehphe gĭt kăl. Sơnăm sơ̆, ‘măng pơgơ̆r tơchă bơngai răt ‘măng mă blŭng hlôi hơnhăk đei jơnei hơ iă. Kơjă tĕch chehphe gĭt kăl tŏk măt hlŏh 5-7 ‘măng kơjă chehphe hmă, sơkơ̆t hơdăh găh tơdrong ‘lơ̆ng kơ chehphe gĭt kăl Việt Nam.