VOV4.Bahnar - Đơ̆ng sơnăm 2017 trŭh sơnăm 2021, hăm tơdrong hơdrin đơ̆ng pơđĭ khŭl chĭnh trĭ păng kon pơlei, dêh char Gia Lai hlôi tơlĕch jang pơtăm 31.000ha ‘long bri, găh să kon pơlei bơbĭt iŏk tĕh bri. Mă lei, kiơ̆ ‘măng dăr lăng hơlen đơ̆ng Jơnŭm vei lăng kon pơlei dêh char Gia Lai tơ̆ mĭnh ƀar apŭng, tơdrong iŏk đei jơnei kơ ‘măng pơtăm bri au tôch tŏ sĕt sot, kơ yuơ dơđăh ‘long pơtăm lôch lơ, đei tơring lôch trŭh 90%.

Tĕh bri ‘long pơtăm kơ ŭnh hnam ‘nhŏng Jiao Klong oei tơ̆ tơring Ia Rsai, apŭng Krông Pa lôch 9/10, kơna ư̆h kơ đei kla ăn kon jên pơtăm

Sơnăm 2020, ŭnh hnam ‘nhŏng Jiao Klong hăm 300 ŭnh hnam oei tơ̆ Ia Rsai, apŭng Krông Pa iŏk pơtăm 417ha ‘long keo lơ̆m mir kơ dĭh sơ̆ ‘nŏh tĕh bri. Lơ̆m mă gô chang ‘long keo tĭh, rim ŭnh hnam oei pơgĕnh chă jơmul pơtăm ƀa hơƀo păng ƀum ƀlang. Đơ̆ng rŏng ƀar sơnăm, lơ̆m 150ha ‘long keo lôch vă đĭ, kơ mơjĭt hektar lăp hơrĭh tim mă trŭh 50%. Nhen ‘long bri mă ŭnh hnam ‘nhŏng Jiao Klong pơtăm, dơnơm hơrĭh tim mă trŭh 10%, kơna ư̆h kơ gơ̆h vă kla ăn kon jên pơtăm ‘long bri:“Nhôn jei tôch ‘mĕh pơtăm ‘long mă lei tĕh tơ̆ au tôch rang rar ‘long ư̆h kơ kĕ blŭh vơ̆, tĕh tơ̆ au ngơ ngal pơtăm yă kiơ jei ư̆h kơ jing, atŭm hăm tŏ ‘mi kial chrĭh chrĕng dơ̆ng, pơyan phang hmă hmă đunh khei ‘năr kơna ‘long tơnap mă blŭh vơ̆”.

Dơnơm ‘long pơtăm jăl jang 2017-2021 tơ̆ lơ tơring kơ dêh char Gia Lai đei hơrĭh, blŭh vơ̆ jing ‘lơ̆ng tôch tŏ sĕt

Jei lei lăi, tơdrong chă pơtăm ‘long bri tơ̆ rim hơnĭh vei lăng lơ̆m khei ‘năr au tơ̆ apŭng Krông Pa jei hơrĭh tôch tŏ sĕt. Ƀok Vũ Đức Dân-Kơdră chĕp pơgơ̆r Dơnŏ anĭh vei lăng Bri pơtăm Ia Rsai, apŭng Krông Pa tơbăt, lơ̆m 2 sơnăm 2019-2020, Dơnŏ anĭh vei lăng bri Ia Rsai, apŭng Krông Pa pơtăm 60ha ‘long keo lai, mă lei trŭh dang ei lăp đei vă jê̆ 7ha ‘nŏh ‘long hơrĭh jing ‘lơ̆ng. Kiơ̆ đơ̆ng ƀok Dân, đei lơ tơdrong pơm ăn trŭh pơtăm ‘long bri lơ̆m hơgăt tĕh pơbĭt iŏk tĕh bri ư̆h kơ đei jing ‘lơ̆ng. Lơ̆m au, mă blŭng jĭ đĭ đăng groi tĕh pơtăm ‘long bri au hơtăih hơtŏ, tĕh groi kông ngơ ngal; khei ‘năr chă pơtăm tơƀơ̆p hê̆ phang pơđang đunh năr dơ̆ng. Atŭm hăm ‘nŏh kon jên ăn chă pơtăm ‘long bri hrei au tŏ sĕt dơ̆ng, ư̆h kơ trŏ lăp hăm tơdrong chŏh jang sa kơ kon pơlei tơ̆ au:“Găh trong jang tơgum djru tơmơ̆t jên jang, tĕh đak tim mă tơgŭm trŏ lăp hăm tơdrong ‘mĕh vă kơ kon pơlei. Mĭnh chăl sơnăm chă pơtăm ‘long bri, vei lăng hmă hmă kơtĕch 4 sơnăm. Tơdrong chă kŏh tĕch ‘long bri lơ̆m ‘măng pơtăm ‘nŏh kơ lơ̆m 1ha iŏk đei hlŏh 35 trĭu hlak jên. Lơ̆m mă nŏh tĕh đak chă tơgŭm ăn lăp 2 trĭu 500.000 hlak jên. Kon pơlei tơ̆ au găh lơ kon kông, erĭh sa tơnap tap. Kon pơlei ư̆h kơ đei kon jên tơmơ̆t jang, vei lăng. Đơ̆ng mă nŏh trŭh dơnơm ‘long lôch, roi năr roi lơ”.

Kiơ̆ đơ̆ng Jơnŭm vei lăng kon pơlei dêh char Gia Lai, atŭm hăm apŭng Krông Pa, pơtôch dăr lăng tơ̆ rim apŭng Phú Thiện, Chư Pưh... jei ƀô̆h lei lăi mơ̆n. Jơnŭm vei lăng kon pơlei dêh char Gia Lai athei Trung ương chă hơlen, hơmet pơ ‘lơ̆ng dôm tơdrong tim mă lăp lơ̆m chă tơgŭm ăn kon jên ăn kon pơlei păng rim hơnĭh pơtăm bri, vă tơgŭm ăn tơdrong pơtăm ‘long bri đei hơrĭh jing ‘lơ̆ng, vă trong jang pơtăm ‘long bri hơnhăk đei iŏk yua kơ jăp ăn kon pơlei.

Bơngai chĭh: Nguyễn Thảo

Tơblơ̆ nơ̆r: Amazưt