VOV4.Bahnar - Pơ gê 17/6, Anih tơm vei lăng choh jang xa păng atŏk tơ iung tơ ring tơ rang pơ gơ̆r pơm lêh "Tơ lĕch nơ̆r roi tơ băt păng kơ sô̆ chih răk găh Anih rong kon tơ rong". ‘Nâu jĭ 1 lơ̆m 2 tơ drong ‘ngoăih kơ rei pơ tăm đei Anih tơm vei lăng choh jang xa păng atŏk tơ iung tơ ring tơ rang rơih vă tưk tơ iung tơ drong jang hăm kơ măy sô̆ lơ̆m sơ năm 2022.

Khei ‘năr âu ki, Anih vei lăng rong kon tơ rong, Anih tơm vei lăng choh jang xa păng atŏk tơ iung tơ ring tơ rang jang hơ doi hăm Grŭp jang Bưu chính viễn thông Việt Nam chih pơ jing, tơ lĕch jang pơ long năng kơ măy phần mềm vă chih tơ mât, roi tơ băt, pơ jing đei kơ sô̆ chih răk găh tơ mam hiĕm ăn kon tơ rong păng chih răk găh anih rong kon tơ rong, hăm dang 60 tơ drong jang. 

Kơ măy chih răk găh tơ drong rong kon tơ rong đei năng tôch gĭt kăl vă hơ tŏk kơ sư̆k vei lăng, chĕp kơ̆l pơ gơ̆r đơ̆ng anih jang vei lăng tĕh đak, pơ gơ̆r tưk tơ iung tơ drong rong kon tơ rong kiơ̆ trong tơ lĕch, pơm lăp hăm tơ drong ‘mĕh vă tơ̆ anih tĕch mơ dro. Atŭm hăm ‘nŏh, vei kơ jăp tơ drong ‘lơ̆ng, sơ đơ̆ng tơ mam xa đơ̆ng rong kon tơ rong vă pơm hơ tŏk kơ jă kăp gĭt, kơ sư̆k pơ jei đơ̆ng tơ mam rong kơ Việt Nam.

Dơ̆ng: Tơ blơ̆