VOV4.Bahnar - Tơ̆ apŭng Krông Pach, dêh char Dak Lak ‘nao âu pơ gơ̆r lêh roi tơ băt tơ drong tĕch mơ dro plei sâu riêng tơ̆ tĕh đak kiơ̆ trong tơm ‘măng mă blŭng kiơ̆ hla ar kĭ pơ kăp đơ̆ng Anih tơm vei lăng choh jang xa păng atŏk tơ iung Việt Nam păng Anih vei lăng, iŏk thuê̆ tơ mam tĕch mơ dro hăm tĕh đak đe kơ Trung Quốc. Tơ drong ‘nâu pơih đei tơ drong ‘lơ̆ng tih ăn plei sâu riêng đơ̆ng Việt Nam tĕch kiơ̆ trong tơm truh tơ̆ tĕh đak răt yoa tơ mam tih hlŏh lơ̆m apŭng plenh tĕh.

Tơ mam plei sâu riêng mă blŭng đơ̆ng Việt Nam tĕch tơ̆ tĕh đak đe kiơ̆ trong tơm

Tơ mam plei sâu riêng mă blŭng tĕch kiơ̆ trong tơm ‘moi kiơ̆ Hla ar kĭ pơ kăp đơ̆ng Anih tơm vei lăng choh jang xa păng atŏk tơ iung tơ ring tơ rang Việt Nam păng Anih vei lăng iŏk thuê̆ tơ mam tĕch mơ dro hăm tĕh đak đe kơ Trung Quốc ‘nŏh hlŏh 300 tân đei pơ tăm tơ̆ Dak Lak. ‘Nâu jĭ tơ ring đei tĕh pơ tăm sâu riêng xă mă 2 lơ̆m tĕh đak (đơ̆ng rŏng kơ Tiền Giang) hăm dang 15.000ha, plei phĕ đei sơ năm 2022 dang 170.000 tân.

Ƀok Y Giang Gry Niê Knơng, Phŏ Kơ dră vei lăng kon pơ lei dêh char Dak Lak chơt hơ iă ăn tơ băt, hrei ‘nâu, dêh char đei Anih vei lăng iŏk thuê̆ tơ mam tĕch mơ dro hăm tĕh đak đe kơ Trung Quốc kĭ ăn 4 kơ sô̆ chih tơ băt anih tăh tơ mam sâu riêng lơ̆m tơ pu păng 23 kơ sô̆ chih tơ băt tơ ring pơ tăm (iŏk đei vă jê̆ 1 puăt kơ sô̆ chih tơ băt tơ ring pơ tăm lơ̆m tĕh đak đei kĭ ăn). 

Dơ̆ng: Tơ blơ̆