Dôm năr âu, ƀok Võ Đình Việt, oei tơ̆ plei Lạc Nghiệp, xăh Tu Tra, apŭng Đơn Dương, dêh char Lâm Đồng nhen tơ oei lơ̆m pla ŭnh yua ưh pă kĕ tơchă đei jên kla jên cheh ăn anih mong jên. Đơ̆ng rŏng kơ ƀet vaccine jĭ hơkar pơplei Navet – LpVac kơ Kŏng ti Navetco, rơmo iŏk đak toh 80 tŏ kơ ŭnh hnam sư tă kơ đei jĭ klak chroh tôch kơ dêh ngăl. Lơ̆m noh, 11 tŏ đĭ lôch, 12 tŏ alih, 5 tŏ tŏk bŏk bơ vơ gô lôch, dôm rơmo uơ oei dơ̆ng hơnơ̆ng kơ jĭ, ưh pă kĕ ăn tŏh nhen blŭng a. ‘Ngoăih kơ ‘noh, vă dŏng hơmet rơmo, ŭnh hnam sư hlôi tơlĕch hloh 1 ti hlak jên bơngơ̆t bơ̆n pơgang.

Kiơ̆ kơ ƀok Võ Đình Việt, hiong răm mŭk drăm hăm rơmo iŏk đak toh ‘noh tôch kơ tih mă lei Kŏng ti Navetco tơlĕch ăn jên hrŭ ‘mong oei tŏ sĕt hloh kơjă rơmo hơi tơ̆ anih tĕch mơdro kơdih: “Ĭnh tơlĕch ăn nơ̆r tơgop ‘noh jĭ hrŭ ‘mong 50 triệu mĭnh pôm rơmo lôch, oei rơmo plên‘noh hrŭ ‘mong ăn kơ nhôn athei đei 30 triệu. Yua kơ rơmo đĭ alih ‘noh ưh pă đei iŏk đak toh bơih, athei hrŭ ‘mong 30 triệu ‘noh đơ̆ng rŏng âu sư sơđơ̆ng ‘noh ĭnh tĕch rơmo ‘noh đei 10-15 triệu, akŏm hăm jên hrŭ ‘mong 30 triệu dơ̆ng ‘noh ĭnh mă kĕ rong ming plơ̆ng dơ̆ng. Ăn mưh ưh kơ hrŭ ‘mong đei 30 triệu mă nhen kơsô̆ jên tŏk bŏk tơlĕch ăn ‘noh nhôn lăp đei pơdơh kơ rong đĕch, pơm liơ mă rong kĕ, rơmo tơ̆ yơ dơ̆ng mă rong”.

Kơsô̆ kơjă hrŭ ‘mong ‘nao hloh mă Kŏng ti Navetco tơlĕch ăn, hăm rơmo iŏk đak toh đei lôch đei kơsô̆ jên hrŭ ‘mong 60.000 hlak jên 1 kĭ hơi, 70.000 hlak jên 1 kĭ rơmo alih, 80.000 hlak jên 1 kĭ rơmo plên păng 85.000 hlak jên 1 kĭ rơmo oei kieo.... Kiơ̆ kơ ƀok Trần Quang Huy, bơngai rong rơmo iŏk đak toh tơ̆ plei Lạc Nghiệp, xăh Tu Tra, apŭng Đơn Dương, kơsô̆ kơjă hrŭ ‘mong âu đơ̆ng Kŏng ti Navetco lăp dang 1/3 kơsô̆ jên hiong răm đơ̆ng kon pơlei rong rơmo: “Hiong răm ‘noh ưh kơ đei bu ‘meh đơ̆ng kon pơlei păng kŏng ti, mă lei păih kŏng ti kăl athei set hơlen, tơgŭm vă kon pơlei chă rong dơ̆ng athei đei dang 70-80%, 1 ‘nu pŭ hiong tŏ sĕt. Oei dang ei kon pơlei pŭ răm lơ dêh hnang, kŏng ti hrŭ ‘mong tŏ sĕt dêh, jên tĕch hŭt pơgoh rơmo, akŏm hăm jên tơgŭm oei ưh kơ tôm kla jên ăn anih mong jên dơ̆ng ‘noh iŏk đơ̆ng yơ mă nhôn vă rong dơ̆ng.”

Kiơ̆ kơ ƀok Trần Văn Hiếu, Kơdră Khŭl kon pơlei jang chŭn mir plei Bồng Lai, xăh Hiệp Thạnh, apŭng Đức Trọng, Kŏng ti Navetco hơdrô̆ tơlĕch kơjă hrŭ ‘mong ưh kơ lăng kiơ̆ lơ̆m tơdrong hơyơ. Lăp jô̆ hơdrô̆ rơmo iŏk đak toh tơ̆ anih tĕch mơdro hrei ‘nâu đei kơjă hloh 70 triệu hlak jên 1 pôm, ƀơ̆t mă kơjă hrŭ ‘mong tam mă tôm răt 1 puăt rơmo ‘noh kon pơlei ưh kơgơh vă rong ming dơ̆ng. Kiơ̆ kơ ‘noh dơ̆ng, Kŏng ti Navetco lăp jô̆ khei ‘năr hrŭ ‘mong đơ̆ng năr đei ƀôh jĭ blŭng a tơ̆ rơmo klĕp truh ‘năr 26/9/2024 ‘noh ưh kơ trŏ, yua kơ truh khei ‘năr âu rơmo oei đei tơdrong jĭ hơ lơ̆k dơ̆ng păng lôch.

Ƀok Trần Văn Hiếu, tơroi: “Trong jang kơjă hrŭ ‘mong kŏng ti tơlĕch ăn ưh kơ đei 1 tơdrong ‘lơ̆ng hơyơ hloi. Kŏng ti akhan hlôi răp mơ̆ng nơ̆r tơgop đơ̆ng dôm anih pơtruh yŏng rơmo ‘noh kon pơlei athei ‘noh kăl tơroi rơđăh ‘noh jĭ anih jang hơyơ vă đei tơdrong răih đăih, yua kơ jă răt rơmo hrei ‘nâu ưh kơ đei tŏ sĕt. Pơtih gia tơ̆ Dalat milk kơjă jô̆ păh lăp ‘noh đơ̆ng 70-85 triệu tŏ rơmo; oei Kŏng ti rơmo iŏk đak toh Châu Á Thái Bình Dương ‘noh jô̆ păh lăp 85-86 triệu 1 pôm. ‘Nhŏ kơ dôm tơdrong jang đơ̆ng teh đak nhen tơdrong jang hơtŏk tơiung rơmo âu ki tơ̆ apŭng Cát Tiên (Lâm Đồng) ‘noh 1 pôm rơmo kơjă kŭm đĭ 75-85 triệu hlak jên bơih mă ưh kơ đei rơmo hơ yơ tŏ sĕt nhen kŏng ti akhan ôh”.

Jô̆ truh khei ‘năr âu, anih jang kơpal dêh char Lâm Đồng chih iŏk đei hloh 6.800 tŏ rơmo iŏk đak toh đei jĭ klak chroh đơ̆ng rŏng kơ ƀet vaccine jĭ hơkar pơplei Navet – LpVac yua đơ̆ng Kŏng ti Navetco pơtruh, lơ̆m noh đei vă jê̆ 500 tŏ rơmo hlôi đei lôch. Vă tơgŭm ăn bơngai rong, ‘năr 20/8 âu ki, Anih vei lăng kon pơlei dêh char Lâm Đồng hlôi tơlĕch ăn tơdrong tơchơ̆t pơjing grŭp bơ̆jang tơgŭm hrŭ ‘mong hiong răm tơ̆ rơmo iŏk đak toh đei jĭ klak chroh yua đơ̆ng ƀet vaccine jĭ hơkar pơplei. Mă lei, đơ̆ng doh truh dang ei, grŭp bơ̆jang ‘nâu oei tam mă đei tơdrong jang kiơ lơ̆m tơdrong tơgŭm hrŭ ‘mong hiong răm ăn kon pơlei rong rơmo iŏk đak toh.