VOV4.Bahnar - Jĭ mĭnh lơ̆m lơ tơring kơ dêh char Dak Lăk đei rơvơn găh tiu, apŭng Cư Kuin hlôi hơdrin apĭnh păng đei drơ̆ng hơnăn tơpôl Tiu Cư Kuin lơ̆m sơnăm 2016. Mă lei, đơ̆ng rŏng vă jê̆ 5 sơnăm đei drơ̆ng hơnăn au lăp lơ̆m hla bơar đĕch, tim mă đei rơvơn iŏk yua vă atŏk tơ iung hơnăn tơmam drăm nhen hơpơi ‘mĕh vă.

Kon pơlei apŭng Cư Kuin, dêh char Dak Lăk phĕ tiu pơyan jang sa sơnăm 2021

Lơ̆m apŭng Cư Kuin đei hlŏh 4.500 ha tiu, lơ̆m au đei vă jê̆ 3.700 ha tiu đei plei, lơ̆m 1 ha phĕ iŏk đei 3 tân 2 tă, lơ̆m mĭnh sơnăm phĕ đei hlŏh 11.000 tân. Tơdrong kăl vă pơma trŭh ‘nŏh tơmam drăm tiu tơ̆ au tôch kơ ‘lơ̆ng pơtêng hăm rim tơring anai, tơdrong iŏk đei tiu kơ loăi 1 păng kơ loăi ‘lơ̆ng hlŏh ‘nŏh tôch kơ lơ, đei đe răt iŏk lơ, kơ yuơ lơ lŏh tơmam drăm tiu tơ̆ au ling lang đei bơngai mơdro răt măt hlŏh 10% dơ̆ng hăm kơ jă tiu. Hăm tơdrong ‘mĕh vă atŏk kơ jă kăp gĭt ăn kơ tiu, sơnăm 2016, apŭng Cư Kuin kơ yuơ Hơnĭh bơ̆ jang vei lăng Trong tơchăr hơgei găh Dơnŏ anĭh tơm vei lăng jang Khoa hŏk-Kmăi kmŏk ƀơk ăn. ‘Nau jing hơyak gĭt kăl hlŏh lơ̆m pơjing hơnăn tơmam drăm vă atŏk kơtang kơ jă tơmam drăm tơring. Mă lei, đơ̆ng rŏng 5 sơnăm apĭnh pơjing đei drơ̆ng nơ̆r ‘nŏh tơdrong atŏk tơ iung hơnăn au oei tim mă iŏk yua hăm rim tơmam drăm tiu ayơ ‘mơ̆i. Tơblang hơdăh tơdrong tơm pơm ăn tơdrong au, ƀok Lê Văn, kang ƀô̆ hơnĭh jang vei lăng Mŭk drăm Trong hnam apŭng Cư Kuin tơbăt: Tiu Cư Kuin lăp apĭnh pơjing hơnăn lơ̆m tĕh đak kơna rim tơdrong tơchơ̆t găh ‘lơ̆ng lăp iŏk yua lơ̆m tĕh đak, găh vă tĕch tơ̆ tĕh đak đe ‘nŏh kăl đei pơkăp kơtang hlŏh kơna rim mă gan lăp.“ Hơnăn au bơ̆n tŏk bŏk apĭnh pơjing hơnăn lơ̆m tĕh đak ư̆h khan hơnăn apŭng plĕnh tĕh. Hơnăn lơ̆m tĕh đak ‘noh lăp gơ̆h tĕch mơdro lơ̆m tĕh đak kơna ư̆h kơ kăl pơ koĕl kơtang mă lei tơnap mă pơjei hăm rim tiu đe ư ang anai nhen: Tiu Phú Quốc, Tiu Vĩnh Linh…Găh tơdrong vă tĕch mơdro tơ̆ tĕh đak đe ‘nŏh tơhlăk lơ̆m tơdrong đei kơ chơ̆t pơgang vei lăng ‘long pơtăm lơ̆m găr tiu. Vă iŏk yua gơ̆h hơnăn lei găh tơdrong ‘lơ̆ng kơ tiu kăl ƀlep ‘lơ̆ng hlŏh mă hơnĭh vei lăng mŭk drăm lăp  vei lăng lơ̆m tĕch mơdro găh tơdrong jang ‘nŏh jĭ găh dơnŏ anĭh vei lăng chŏh jang sa vei lăng”.

Kon pơlei apŭng Cư Kuin, dêh char Dak Lăk phĕ tiu pơyan jang sa sơnăm 2021

Găh kiơ̆ đơ̆ng ƀok Y Tong Buôn krông, Kơ iĕng Kơdră chĕp pơgơ̆r Dơnŏ anĭh vei lăng Chŏh jang sa păng Atŏk tơ iung tơring tơrang apŭng Cư Kuin, lăp đơ̆ng rŏng apĭnh pơjing đei drơ̆ng hơnăn tiu au, Hơnĭh au atŭm hăm rim hơnĭh bơ̆ jang anai hlôi pơgơ̆r pơtho tơbăt trong jang chă pơtăm, vei lăng, pơm tơlĕch kiơ̆ trong iung jang chŏh jang sa ‘lơ̆ng ăn kon pơlei; ƀrư̆ ƀrư̆ pơjing rim khŭl jang tiu kơ jăp ‘lơ̆ng vă yak trŭh pơjing rim Hơp tak xah găh tiu rơgŏh ‘lơ̆ng ... Mă đơ̆ng apŭng tôch hơdrin mă lei kơ yuơ đĭ đăng kon pơlei lăp jang kơ dĭh kơ dĭh, tim mă tơgoăt dĭh băl jang hơdoi kơna oei tŏ sĕt hơnĭh mơdro sa dơ̆ng pang tang măt ăn lơ̆m atŏk tơ iung kiơ̆ trong pơm tơlĕch tơmam drăm.“Dăh mă ƀlep ‘nŏh hơnăn tiu kăl akŏm rim khŭl jang hơdoi, hơp tak xah vă răt akŏm tơmam drăm ‘lơ̆ng, mă lei rim ŭnh hnam đei ƀô̆h ‘nŏh mă tơlĕch jang kiơ̆ kĕ, găh ŭnh hnam ư̆h kơ đei ƀô̆h ‘nŏh tôch tơnap. Kơ yuơ mư̆h tơlĕch jang kiơ̆ lei tơdăh vă jang kiơ̆ ƀlep tơdrong pơkăp ‘lơ̆ng lei kăl đei lơ kon jên tơmơ̆t jang ‘mơ̆i mă đei”.

Hăm kon pơlei oei tơ̆ Cư Kuin, đơ̆ng sơ̆ bơih tiu hlôi jing ‘long pơtăm hơnhăk đei iŏk yua kơ jăp ăn đe sư đei tơdrong erĭh sa sơđơ̆ng. Kơ yuơ lơ lŏh, kon pơlei tŏk bŏk hơdrin jang tiu đei plei ‘lơ̆ng; drơ̆ng vang jang sa atŭm pơm tơlĕch đei tơmam drăm ‘lơ̆ng, sơđơ̆ng ƀlep ăn tơdrong tĕch răt. Tơdrong mă kon pơlei ‘mĕh vă ‘nŏh ‘ngoăih tơdrong hơdrin pơjing hơnăn Tiu Cư Kuin ‘nŏh khŭl kơdră tơring oei jing gơng tơrŏh klŏh klĕch dĭh băl vă kon pơlei hăm hơnĭh mơdro sa jang hơdoi lơ̆m jang, tĕch mơdro iŏk yua hơnăn vă pơm ăn kơ jă tiu măt ƀiơ̆. Ƀok Nguyễn An Thạch, Kơdră chĕp pơgơ̆r Khŭl jang tiu Cư Kuin tơbăt:“ Apŭng hlôi pơjing đei hơnăn tơbăt ăn kơ tiu ‘nŏh ba jei tơchĕng tôch kơ lơ vă hơnhăk hơnhăk tiu đei drơ̆ng nơ̆r ‘lơ̆ng đơ̆ng nŏh vă pơjing đei plei tiu rơgŏh ‘lơ̆ng. Mă lei kon pơlei oei tim mă đei jang hơdoi hăm hơnĭh mơdro sa vă atŭm dĭh băl vang jang. ‘Nŏh jing tơdrong tơnap păng tơdrong tơtăm kơtang hlŏh hăm kon pơlei kơna ĭnh hơpơi ‘mĕh vă rim hơnĭh bơ̆ jang tơring hơdrin pơjing rơvơn vă kon pơlei băt hơdăh dôm tơdrong pơkăp vă pơjing đei tơmam drăm ‘lơ̆ng đơ̆ng nŏh kơ jă hăp đei măt ƀiơ̆” .

Bơngai chĭh: Hương Lý

Tơblơ̆ nơ̆r: Amazưt