VOV4.Bahnar - Dôm sơ năm tơ jê̆ âu, chik đei lăng ‘noh jĭ ‘long pơ tăm tơm hơ nhăk ăn iŏk yua mŭk drăm ăn kon pơ lei rim xăh hơ tăih hơ tŏ Cư Pui, Cư Đrăm păng Yang Mao, apŭng Krông Bông, dêh char Dak Lak. Jên iŏk đơ̆ng chik hlôi tơ gŭm lơ ŭnh hnam klăih đơ̆ng dơ nuh hin tŏk pơm pơ drong. Mă lei, pơ yan gơ̆ iŏk sơ năm, bơ ngai pơ tăm chik tơ̆ Krông Bông tŏk bŏk đang tơ chă anih tĕch ăn kơ loăi plei âu.

Pơ yan chik sơ năm ‘nâu, ŭnh hnam ƀok Trần Dương Sỹ, oei tơ̆ xăh Cư Đrăm, apŭng Krông Bông, dêh char Dak Lak pơ tăm 4 hek tar. Pơ đĭ kơ sô̆ chik đĭ truh pơ yan gơ̆ tĕch mă lei ŭnh hnam sư nhen tơ oei tơ̆ kơ pal ŭnh, yua kơ jă tĕch tŏk bŏk tôch kơ re, bơ ngai mơ dro năm răt kŭm tŏ sĕt. Ƀok Trần Dương Sỹ tơ băt, tơ mơ̆t jên jang vă jê̆ 160 triệu hlak jên răt phŏng, rim kơ loăi tơ mam sinh học, pơ gang hơ drông, bơ ngai vei lăng... vă pơ gar ‘long đei plei lơ, mă lei dang ei chik tĕch hơ nat, hơ mơt kơ lôh tŏk bŏk đei ƀôh.

 “Khei ‘năr hơ drol đunh kơ âu dang 1 puăt khei ‘noh tĕch đei kơ jă 20.000 hlak jên 1 pôm plei, dang ei lăp đei 12.000 – 13.000 hlak jên 1 pôm plei. Bơ ngai mơ dro đe răt iŏk đe sư oei tơ roi vă jur dơ̆ng mư̆h kon pơ lei gơ̆ tĕch lơ. Kon pơ lei lăp ‘mĕh lơ̆m tơ ring đei hnam kơ măy pơm tơ lĕch dăh mă pơ jing hơp tak xăh tơ klep hơ dai hăm rim anih tơ gŭm răt chik sơ đơ̆ng.”

Yua đơ̆ng lăp hăm tŏ ‘mi kial, teh, chik pơ tăm tơ̆ dôm xăh Cư Đrăm, Cư Pui păng Yang Mao (Krông Bông) ing lang đei ăn plei lơ đơ̆ng 35 - 40 tấn 1 hek tar 1 pơ yan

Ưh kơ hơ drô̆ ŭnh hnam ƀok Sỹ, mă kơ hrĕng ŭnh hnam pơ tăm chik tơ̆ rim xăh Cư Pui, Cư Đrăm păng Yang Mao, apŭng Krông Bông kŭm mơ mat tat ƀơ̆t chik truh pơ yan gơ̆ tĕch lơ. Dôm pơ yan hơ drol, hăm kơ jă tĕch chik đơ̆ng 16.000 – 20.000 hlak jên 1 pôm plei trăp đơ̆ng 2 kĭ tơ̆ kơ pal, ‘noh dang ei lăp oei pă 10.000 – 12.000 hlak jên. Ƀơ̆t chik đei plei lơ, đei kơ jă, 1 hek tar ƀơ̆t lăp ăn lơi truh 50 triệu hlak jên, gơ nang đơ̆ng noh mă lơ ŭnh hnam jang chik hlôi man đei hnam ‘lơ̆ng. Pơ yan sơ năm ‘nâu chik re ‘noh lơi tŏ sĕt, ƀơ̆t lăp lơ ŭnh hnam đei lôh.

Yă Niê Thanh Trang – Phŏ Bí thư Đảng xăh Cư Đrăm, apŭng Krông Bông tơ băt, lơ̆m xăh đei hloh 300 ŭnh hnam pơ tăm chik, hăm akŏp teh să dang 450 hek tar. Tơ̆ hơ năp tơ drong chik ling lang athei tơ jră hăm tơ drong plei lơ kơ jă re, kơ jă măk mă lei plei ư̆h kơ lơ, khŭl kơ dră tơ ring hlôi tơ lĕch jang lơ trong jang tơ gŭm bơ ngai pơ tăm, mă lei tam mă hơ tŏk iŏk yua:

 “Khei ‘năr âu ‘noh kon pơ lei tŏk bŏk gơ̆ iŏk chik mă lei tam mă đei anih răt iŏk kơ na kơ sô̆ chik kon pơ lei tĕch đei kơ jă re. Kơ dră Đảng đei tơ gop nơ̆r ăn kơ dră kơ pal athei apĭnh trong jang krao hơ vơn sơng iŏk tơ mơ̆t jên jang ming man hnam kơ măy pơm tơ lĕch vă răt iŏk chik ăn kon pơ lei. Mă lei, truh dang ei oei tam mă jang kiơ̆ đei”.

Mă lei anih răt iŏk chik ling lang pơm ăn bơ ngai pơ tăm tơ̆ dôm xăh kơ apŭng Krông Bông tơ tăm

Lơ̆m apŭng Krông Bông dang ei đei hloh 550 hek tar chik, akŏm găh lơ tơ̆ rim xăh Cư Pui, Cư Đrăm păng Yang Mao. Yă Trần Thị Len – Kơ dră vei lăng Hơp tak xăh choh jang sa Cư Đrăm hơ len lăng, chik tôch kơ lăp hăm teh, tŏ ‘mi kial tơ̆ tơ ring. Plei ling lang iŏk đei 35 - 40 tấn plei 1 hek tar 1 pơ yan. Plei ‘ngam, ƀâu phu, jơ la hơ tŏ, kơ mâu dreng rang bơ bleng lăng tôch kơ hơ iă. Tơ drong plei lơ, ‘lơ̆ng đơ̆ng chik tơ̆ Krông Bông hlôi đei hơ len lăng hơ dăh đơ̆ng sơ năm hơ drol; mă lei tơ drong tơ tăm hloh đơ̆ng bơ ngai pơ tăm ‘noh jĭ anih răt iŏk tơ mam.

 “Teh pơ tăm kơ chik kơ xăh Cư Đrăm nhôn dang ei tŏk truh 450 hek tar, mă lei truh dang ei tam mă tơ mơ̆t jên jang ăn kon pơ lei. Truh khei ‘năr âu tam mă đei kŏng ti dăh mă anih jang mơ dro sa hơ yơ truh kĭ pơ kăp răt iŏk chik. ‘Mĕh vă đơ̆ng bơ ngai jang lơ̆m hơp tak xăh ‘noh jĭ tơ chă đei anih vă tĕch đei chik. Pơ ma atŭm kon pơ lei jang chŭn mir jang đei plei chik ‘noh tôch kơ mơ nat tat.

            Tuấn Long: Chih

            Thuem: Tơ blơ̆