VOV4.Bahnar - ‘Năr 14-12, tơ̆ plt Buôn Ma Thuột, dêh char Dak Lak, Anih tơm vei lăng jang pơ gang jang hơ doi hăm Anih hơ len năng pơ rang jĭ Tây Nguyên pơ gơ̆r hop akŏm khoa hŏk găh tơ drong tang găn jĭ ưh đei tơ pŏh sơ năm 2021.

Jơ bơ̆ jang lơ̆m hop akŏm

Kiơ̆ nơ̆r tơ roi tơ̆ Hop akŏm, tơ drong pŭ trăp đơ̆ng dôm tơ drong jĭ ưh đei tơ pŏh (nhen ung thư, jĭ plei nuih, hơ yô đak sĭk, jĭ kơ chĭl lơ̆m tơ sŏh, hiĕn drek drok păng 1,2 tơ drong jĭ nai), oei iŏk đei truh 70% tơ drong pŭ trăp đơ̆ng tơ drong jĭ lơ̆m tĕh đak. Dôm tơ drong jĭ âu kŭm jing tơ drong tơm pơm ăn lơ bơ ngai lôch răm. Pơ hlom năng, 1 sơ năm kơ sô̆ bơ ngai lôch yoa đơ̆ng jĭ ưh đei tơ pŏh truh 77% akŏm đĭ đăng kơ sô̆ bơ ngai lôch yoa jĭ jăn.

Tơ̆ Tây Nguyên, sơ năm 2020 WHO tơ gŭm ăn 40 xăh găh dêh char Kon Tum păng Lâm Đồng vei lăng, hơ met jĭ păng chih jô̆ găh tơ drong jĭ ưh đei tơ pŏh. Truh sơ năm 2021, trong jang âu đei pơih xă tơ̆ 150 xăh găh 5 dêh char Tây Nguyên. Dôm nơ̆r pơ ma lơ̆m hop akŏm akhan, tơ drong pŭ trăp mưh vei lăng păng tơ lĕch jang hơ met jĭ, tang găn jĭ ưh đei tơ pŏh oei tôch mơ mat tat kăl đei trong roi tơ băt, vei lăng mă ‘lơ̆ng hlŏh dơ̆ng.

Dơ̆ng: Tơ blơ̆