VOV4.Bahnar - Tơ̆ apŭng Cư M’gar, dêh char Dak Lak jĭ pơ lei tơ̆ hơ kar păng jĭ klak nhŭng Châu Phi oei đei tơ̆ lơ tơ ring pơm ăn lơ unh hnam rong hiong răm tôch dêh.

Rơ mo jĭ pơ lei tơ̆ hơ kar lôch vă jê̆ đĭ, yă Hoàng Thị Chấn tơ̆ Kueng kơ phô̆ 8, thĭ trơ̆n Quảng Phú, apŭng Cư M’gar, dêh char Dak Lak tôch sơ ‘ngon mư̆h kơ băt dôm yơ kon jên đơ̆ng unh hnam tơ lĕch jang hiong pơ gŏh. Yă Chấn ăn tơ băt, rơ mo đei 4 tŏ, dang ei lôch 3 tŏ bơih, hiong răm vă jê̆ truh 100 triu: “Chă krao đe năm ƀet pơ gang, tang găn jĭ, pruih bơ̆n pơ gang bơih ră. Mă lei jĭ tơ pŏh tôch hrĕnh, adrol ‘nŏh rơ mo yŏng lôch, 3 năr đơ̆ng rŏng rơ mo kon lôch dơ̆ng. Dang ei truh rơ mo ‘nâu, ‘nao 2 khei đei jĭ ‘năi, kơ na kŭm lôch hloi”.

Kăn ƀô̆ jang thŭ y ƀet pơ gang ăn rơ mo

Kŭm hăm jĭ pơ plei tơ̆ hơ kar kơ pô, rơ mo, dang ei tơ̆ apŭng Cư M’gar jĭ klak nhŭng Châu Phi kŭm oei tơ pŏh tôch hrĕnh. Ƀok Nguyễn Ngọc Đương, tơ̆ plei Hiệp Hoà, xăh Quảng Hiệp, apŭng Cư M’gar ăn tơ băt, 3 tŏ nhŭng yŏng păng nhŭng rong tĕch kơ unh hnam ƀok đĭ vă tĕch bơih tơ tă tơ pŏh jĭ, athei sŏh hŭt lê̆: “Inh ƀet tôm vắc xin 3 lơ̆m 1, đei jĭ klak, jĭ hla đon, rơ ka ƀơ̆r tơ plŏ kơ chôp. Nhôn rong hơ drô̆ tôch sơ đơ̆ng mă lei ưh băt jĭ tơ pŏh đơ̆ng yơ. Năr blŭng 1 pôm đei jĭ ƀre ƀrônh tơ̆ hơ kar, truh năr mă 2 đĭ đăng nhŭng jĭ bun đĭ truh jĭt dôm tŏ, đei hloi nhŭng yŏng păng nhŭng rong vă tĕch. Inh tơ roi ăn anih jang thŭ y xăh, khul kơ dră pơ gơ̆r xăh đe jur set hơ len jĭ ‘nŏh akhan nhŭng jĭ klak Châu Phi”.

Sŏh, ƀŭ hŭt kon tơ rong jĭ

Kiơ̆ kơ sô̆ chih jô̆ đơ̆ng Anih vei lăng choh jang xa păng atŏk tơ iung tơ ring tơ rang apŭng Cư M’gar, truh dang ei jĭ pơ plei tơ̆ hơ kar kon tơ rong đei tơ̆ 42 pơ lei, kueng kơ phô̆ găh 14 xăh, thĭ trơ̆n. Khul jang kơ pal pơ gơ̆r sŏh hŭt 88 tŏ kơ pô, rơ mo trăp vă jê̆ truh 8.500 kĭ. Hăm jĭ kla nhŭng Châu Phi tơ pŏh truh tơ̆ 9 xăh, thĭ trơ̆n, akŏm đĭ đăng nhŭng athei sŏ hŭt vă jê̆ 26.000 kĭ.

Ƀok Nguyễn Quang Đức, Kơ dră Anih vei lăng tơ drong rong kon tơ rong păng jang thŭ y apŭng Cư M’gar ăn tơ băt, dang ei anih jang thŭ y pơ gơ̆r ƀet vắc xin ăn kon tơ rong, jang hơ doi hăm khul kơ dră tơ ring hơ tŏk tơ drong pơm anih gak, vei lăng tơ drong ket ƀuh, chơ chuĕn, tĕch mơ dro kon tơ rong tơ̆ tơ ring.

“Mưh đei jĭ, Anih jang thŭ y păng Anih vei lăng choh jang xa păng atŏk tơ iung tơ ring tơ rang apŭng jang kiơ̆ lơ trong nhen pruih pơ gang pơ lôch pơ rang jĭ, ƀet vắc xin hăm jĭ pơ plei tơ̆ hơ kar kon tơ rong. Truh dang ei jĭ hlôi đei găn bơih. Mưh kơ tơ̆ng nơ̆r tơ roi đei jĭ ‘nŏh anih jang nhôn jur hơ len, hơ met jĭ, iŏk pham gơih ăn dôm anih jang kơ pal set hơ len. Ƀât oei gô anih jang kơ pal set hơ len kon tơ rong yơ đei jĭ ‘nŏh pơ gơ̆r sŏh hŭt hloi. Tơ dăh set hơ len đei jĭ ‘nŏh tơ lĕch trong tang găn păng roi tơ băt ăn tơ ring hloi”.

Tuấn Anh: Chih

Dơ̆ng: Tơ blơ̆