VOV4.Bahnar - Pơ gê 30/11, dêh char Dak Lak pơ tơm ƀet vaccine tang găn jĭ Covid-19 ăn hŏk tro THPT păng hŏk tro ƀô tŭk hăm dang 64.000 ‘nu hŏk tro. Ƀok Nguyễn Văn Lý, Phŏ Kơ dră Anih jang pơ gang plt Buôn Ma Thuột ăn tơ băt: ‘măng mă âu, plt vă ƀet ăn dang 36.000 ‘nu hŏk tro đơ̆ng 15-17 sơ năm păng vă ƀet lơ̆m 2 năr 30/11 păng 1/12.

Dang 64.000 ‘nu hŏk tro đơ̆ng 15-17 sơ năm tơ̆ Dak Lak đei ƀet vaccine ‘măng mă âu

Jơ̆p lơ̆m dêh char Dak Lak dang ei đei 191.058 ‘nu hŏk tro THPT, hŏk tro ƀô tŭk păng hŏk tro jăl 2. Kiơ̆ trong jang, đơ̆ng rŏng kơ ƀet đang vaccine tang găn jĭ Covid-19 ăn hŏk tro THPT păng hŏk tro ƀô tŭk, dêh char Dak Lak vă tơ lĕch trong ƀet vaccine ăn hŏk tro jăl 2 dơ̆ng. Anih vei lăng tơ drong jĭ jăn dêh char Dak Lak ăn tơ băt, vă hơ met ‘lơ̆ng ăn tơ drong ƀet vaccine tang găn jĭ Covid-19 hăm hŏk tro, anih jang pơ gang hlôi pơ truh bơ ngai jang tôm ‘lơ̆ng păng lăp hăm tơ drong tang găn jĭ tơ̆ dôm tơ ring.

Dơ̆ng: Tơ blơ̆