VOV4.Bahnar -  Năr 12/8, Dơnŏ anĭh vei lăng kon pơlei dêh char Dak Lăk tơlĕch trong vă jang tĕch mơdro 2 kơ loăi plei ‘long tơm kơ dêh char ‘noh sâu riêng păng ƀơ hăm phĕ iŏk đei dang 150.000 tân. Trong vă jang tơdra hơdrol ăn tơdrong jĭ hơbŭh Covid-19 roi kơtang păng tơdrong jĭ hơbŭh Covid-19 mơmat tat hlŏh, tĕch mơdro tơ̆ tĕh đak đe tơ ƀơ̆p tôch tơnap tap.

Tŏk bŏk khei 8, lơ mir pơgar sâu riêng Dona đei phĕ, sầu riêng Dak Lăk yak mơ̆t lơ̆m pơyan phĕ tĕch

Kiơ̆ trong vă jang ‘nao đei tơlĕch ăn, Dơnŏ anĭh vei lăng kon pơlei dêh char Dak Lăk tơchĕng hơdrol: tơdăh jĭ hơbŭh Covid-19 ư̆h kơ kĕ tang găn, lei dêh char vei kơ jăp trong tơlĕch jang tĕch tơ̆ tĕh đak đe 70% plei sâu riêng đei, hơtŏ hăm 72.000 tân; 30% uơ oei tĕch mơdro lơ̆m tĕh đak. Hăm plei ƀơ, tĕch lơ̆m tĕh đak 80%, hơtŏ 32.000 tân, pă dôm yơ ‘nŏh tĕch tơ̆ tĕh đak đe. Trong vă jang mă 2 ‘nŏh tơdăh jĭ hơbŭh Covid-19 pơrăm kơtang hlŏh, dêh char gô akŏm bơ̆ jang tơgŭm ăn kon pơlei tĕch mơdro ƀơ, sâu riêng. Trong tơlĕch jang tĕch mơdro tơ̆ tĕh đak đe găh sâu riêng tơ jur pă 50% păng ƀơ lăp 10%. Trŭh dang ei, sầu riêng Dona, tŏk bŏk vă gơ̆h phĕ tĕch, đe chă răt tơ̆ mir pơgar hăm kơ jă dang 45.000 hlak jên lơ̆m 1 kĭ, tơ jur 20% pơtêng hăm sơnăm sơ̆.

Tơblơ̆ nơ̆r: Amazưt