VOV4.Bahnar - Hrei au dêh char Dak Lăk đei 208.000 ha chehphe tŏk bŏk lơ̆m khei ‘năr pruih đak kơtang. Tơdrong ‘mĕh vă đei đak tôch kơtang lơ̆m mă găh đak ư̆h kơ gan măh mai jing tơdrong mơmat tat ăn bơngai pơtăm chehphe lơ̆m lơ sơnăm au ki. Mă lei, lơ̆m pơyan phang au, rim trong jang pruih đak pơkom đei tơlĕch jang kiơ̆ rim tơring hlôi tơgŭm hơmet pơ ‘lơ̆ng ăn tơdrong ư̆h kơ măh đak, chehphe oei blŭh vơ̆ jing ‘lơ̆ng kơtă lơ̆m khei ‘năr phang pơđang kơtang hlŏh.

Pruih nhen ‘mi dăh mă oei krao akhan pruih đak kơtŏh, trong jang hơ iă hlŏh vă tang găn phang pơđang ăn pơgar chehphe tơ̆ Dak Lăk

Ƀok Triệu Văn Khang oei tơ̆ tơring Ea M’Droh, apŭng Cư M’gar đei 2 ha chehphe tơbăt, trŭh dang ei rim hơbong thoong đak, doanau đak dăh mă pơnơ̆t đak đĭ hrơ̆ hroi. Mălei gơnơm pơm kiơ̆ kơ jăp trong pruih đak pơkom, hăm đak ư̆h gan măh đơ̆ng đak koai koer oei sơđơ̆ng ăn mir pơgar ‘long pơtăm blŭh vơ̆ jing ‘lơ̆ng đĕch.“Pruih đak ‘măng mă ƀar au ŭnh hnam măh ƀôm đak đơ̆ng đak koai koer. Mư̆h pruih đak ‘nŏh bơ̆n pơm kiơ̆ pruih đak pơkom. ‘Nŏh chă pruih đak păh ai, ư̆h kơlê̆ đak blai sơlŭng ‘mêm kơ đak.”  

Jei pơm kiơ̆ kơ jăp pruih đak pơkom, ƀok Phùng Văn Nhiên oei tơ̆ tơring Quảng Hiệp, apŭng Cư M’gar hlôi tơplĭh pơ đĭ đơ̆ng chă pruih đak jro jing chă pruih đak kơtŏh iĕ ăn 3 ha chehphe. Ƀok Nhiên tơroi tơbăt, tơmơ̆t jên jang pruih đak kơtŏh iĕ mă đơ̆ng tơhoach kon jên lơ, mă lei đei tĕh đak pơtrŭt jang, tơgŭm djru, adoi sơđơ̆ng ăn chehphe blŭh vơ̆ jing ‘lơ̆ng lơ̆m khei ‘năr tŏ phang pơđang hlŏh.“Tơring ƀơ̆t mir pơgar nhôn au mư̆h trŭh khei ‘năr blŭng pơyan phang ‘nŏh đak dơnau, hơboong thoong đak hrơ̆ hroi pơgŏh. Kơ yuơ lơ lŏh kơna ŭnh hnam ƀôm iŏk đak đơ̆ng đak koai koer vă pruih ăn chehphe. Pơ đĭ mir pơgar ‘long pơtăm hlôi iŏk yua pruih đak kơtŏh, tơdrong mă au đei tĕh đak tơgŭm djru mĭnh poăt kon jên chă pơlăp đing, kmăi kmŏk. Mư̆h pruih đak ‘noh jei pơm kiơ̆ kơ jăp lăng hơlen jơ pruih đak vă kơ hoei pruih đak hram lơ dêh hnang kơnh tơhoach đak, ăp lơ lŏh vă măh đak chă pruih prăt pơyan phang au”.

Dơnŏ anih vei lăng kon pơlei dêh char tơgŭm ăn 50% kon jên pơlăp kmăi kmŏk pruih đak kơtŏh ăn mir pơgar chehphe

Kiơ̆ đơ̆ng ƀok Nguyễn Thanh Long - Kơdră chĕp pơgơ̆r Dơnŏ anih vei lăng pơnơ̆t đak dêh char Dak Lăk tơbăt, tŏ pơđang đunh năr lơ̆m pơyan phang au pơm ăn ư̆h kơ măh đak pruih ăn chehphe, jing tơdrong hlôi ƀô̆h hơnơ̆ng lơ̆m lơ sơnăm au ki tơ̆ dêh char ‘nau. Mă lei, tơdrong mă au tŏk bŏk hơmet pơ ‘lơ̆ng hăm trong lang să rim trong jang pruih đak pơkom. Dơnŏ anih vei lăng kon pơlei dêh char Dak Lăk jei hlôi tơgŭm djru ‘lơ̆ng hơ iă vă kon pơlei jang kiơ̆ kih thuơ̆t pruih đak hle au. “Đơ̆ng blŭng pơyan phang hloi nhôn hlôi chă pơrô̆ athei kon pơlei iŏk yua đak mă pơkom, hơdrin chă mong đak tơ̆ rim dơnau iĕ tơgŭm ăn pruih ăn ‘long pơtăm. Tơdrong pruih đak ‘nŏh pơtho athei kon pơlei pruih đak pơkom, ư̆h kơ pơhoach brăh brư. Tơlĕch jang kiơ̆ tơplih kơmăi kmŏk pruih đak pơkom. Tơdrong mă au hlôi đei Dơnŏ anih vei lăng kon pơlei dêh char tơgŭm ăn 50% kon jên ăn kon pơlei tơdăh ŭnh hnam ayơ pơm kiơ̆ pruih đak pơkom hăm kmăi kmŏk pruih đak kơtŏh”.

Bơngai chih: Tuấn Long

Tơblơ̆ nơ̆r: Amazưt