VOV4.Bahnar - Hăm tơdrong đei, rơvơn găh rim tơmam drăm chŏh jang sa, atŭm hăm trong jang tơgŭm djru đơ̆ng dêh char, đơ̆ng rŏng 3 sơnăm tơlĕch jang kiơ̆, Tơdrong jang mĭnh tơring mĭnh tơmam drăm (OCOP) tơ̆ Dak Lăk hlôi iŏk đei jơnei hơ iă, pơjing đei jơhngơ̆m pran lang să, sơkơt hơdăh hơnăn tơmam drăm tơring.

Kŏng ty Ka kao Nam Trường Sơn tơ̆ Hop akŏm hơlen, rơ̆ih jing tơmam drăm OCOP kơ dêh char

Atŭm hăm chehphe, ka kao ‘nŏh mĭnh lơ̆m dôm tơmam drăm đei lăng tơm hlŏh kơ dêh char Dak Lăk. Mă lei, dôm sơnăm au ki, ka kao Dak Lăk hui đei đe băt trŭh păng găh lơ chă tĕch mơdro tơmam drăm tim mă pơm pơ ‘lơ̆ng. Lăng ƀô̆h tơdrong ư̆h gan hơ iă au, ƀok Trương Ngọc Quang, Kơdră chĕp pơgơ̆r Kŏng ty Ka kao Nam Trường Sơn oei tơ̆ tơring Ea Na, apŭng Krông Ana hlôi lăng ba kơ jăp trŭh tơchă hơnĭh răt iŏk, tơmơ̆t jên jang răt kmăi kmŏk ‘lơ̆ng pơm tơlĕch đei tơmam drăm ka kao ‘lơ̆ng nhen: pŭk ka kao, ƀơ ka kao, ƀĕng keo socola…Vă tơbăt hơdăh ‘lơ̆ng, kŏng ty hlôi vang tĕch mơdro tơmam drăm  OCOP lơ̆m dêh char. Trŭh dang ei, 3 tơmam drăm: Pŭk kao kao, ƀĕng keo Socola găm, ƀĕng keo Socola đak tŏh rơmo kơ kŏng ty iŏk đei 4 sao lơ̆m akŏp 8 tơmam drăm ‘lơ̆ng iŏk đei 4 sao kơ dêh char. Ƀok Trương Ngọc Quang, Kơdră chĕp pơgơ̆r Kŏng ty tơbăt:“ Lăp đơ̆ng rŏng tơmam drăm kŏng ty iŏk đei drơ̆ng nơ̆r OCOP 4 sao dêh char, ‘nŏh jei jing gơng tơrŏh vă kŏng ty vang tĕch mơdro tơmam drăm tơ̆ rim hơnĭh tĕch mơdro OCOP. ‘Moi kiơ̆ rim hơnĭh tĕch mơdro tơmam drăm OCOP, minh păh vă tơbăt hơdăh tơdrong gơ̆h pơm tơlĕch đei tơmam drăm adoi nhen đei tơmam drăm ‘lơ̆ng , đơ̆ng nŏh tơmoi răt iŏk păng hôn bơnê. ‘Moi kiơ̆ rim hơnĭh tech mơdro tơmam drăm OCOP au, tơmam drăm hlôi trŭh tơ̆ tơpang ti kon pơlei răt yua lơ păng tenh koăng hlŏh”

Tơmam drăm OCOP đei tơ ƀô̆h tơbăt tơ̆ Hơnĭh pơdă păng tĕch mơdro tơmam drăm OCOP dêh char Dak Lăk

Kiơ̆ đơ̆ng ƀok Võ Văn Sơn, Kơdră chĕp pơgơ̆r Hơp tak xah chŏh jang sa tĕch mơdro tơmam drăm Thăng Bình, tơring Cư̆ Kty, apung Krông Bông, dêh char Dak Lăk: Tơdrong tơchơ̆t OCOP ăn tơmam drăm roi năr roi lăng ba kơ jăp, hlôi jing jơhngơ̆m pran ăn rim bơngai jang pơm tơlĕch, tĕch mơdro. Rim tơmam drăm đei drơ̆ng nơ̆r OCOP jing mĭnh hơyak đei lăng gĭt kăl hlŏh, tơgŭm ăn tơmam drăm đei vei lăng ‘lơ̆ng, đei tơpu hơnăn ‘lơ̆ng păng atŏk kĕ pơjei tĕch mơdro dơ̆ng. Tơ ƀô̆h hơdăh hlŏh ‘nŏh phe rơgŏh ‘lơ̆ng HTB kơ hơp tak xah mư̆h đei Dơno anĭh vei lăng kon pơlei dêh char Dak lăk drơ̆ng nơ̆r jing tơmam drăm OCOP 3 sao, kơ jă chă tĕch măt hlŏh 3 ‘măng pơtêng hăm hơdrol, tơdrong chă tĕch mơdro jei hlot lơ tŏk đơ̆ng 200 tân trŭh 400 tân lơ̆m 1 sơnăm, hơnhăk đei iŏk yua ‘lơ̆ng hơ iă ăn hơp tak xah adoi nhen rim bơngai jang lơ̆m hơp tak xah. Ƀok Võ Văn Sơn tơbăt:“ Sơ̆ phe hmă pă bĭ bu lăng trŭh, tĕch mơdro jei tơnap tap, mă lei mư̆h iŏk đei drơ̆ng nơ̆r OCOP pơm ăn kơ phe tơmam drăm đei ‘lơ̆ng, đei bơngai răt yua ƀô̆h hơdăh păng răt iŏk tơmam drăm bơ̆n. ‘Nau jei jing tơdrong đei pơjing ‘lơ̆ng đơ̆ng dôm tơmam drăm hmă kơ kon pơlei jing tơmam drăm đei drơ̆ng nơ̆r OCOP rim sao păng jei jing jơ rơvơn vă tơmam drăm kon pơlei gơ̆h tech mơdro tơ̆ au tơ̆ to.”

        Ƀok Nguyễn Hoài Dương, Kơdră chĕp pơgơ̆r Dơnŏ anĭh vei lăng Chŏh jang sa păng Atŏk tơ iung tơring tơrang dêh char Dak Lăk tơbăt: Dak Lăk hrei au đei 46 tơmam drăm OCOP, lơ̆m au đei 8 tơmam drăm iŏk đei 4 sao, păng 38 tơmam drăm iŏk đei 3 sao. Tơdrong hơlen, pơ klep sao ăn rim tơmam drăm OCOP jing tơbăt hơdăh găh ‘lơ̆ng, lăng ‘lơ̆ng kơ măt tơmam drăm. Tơdrong mă au tơgop atŏk kơtang jơhngơ̆m đon hlô̆h vao, hơnăp jang kơ kon pơlei, hơnĭh mơdro sa lơ̆m jang sa, pơm tơlĕch, vei lăng hơnăn kơ tơmam drăm OCOP adoi nhen tơdrong đei iŏk yua ‘lơ̆ng hơ iă ăn bơngai răt yua. Lơ̆m khei năr kơnh, Dơnŏ anĭh vei lăng chŏh jang sa gô jang hơdoi hăm Dơnŏ anĭh vei lăng mơdro sa hơnơ̆ng tơ ƀô̆h tơbăt rim tơmam drăm OCOP hlôi đei lơ̆m dêh char trŭh hăm bơngai răt yua lơ̆m tĕh đak păng tơ̆ tĕh đak đe.“Tơdrong tơgoăt tĕch răt tơmam drăm ‘nŏh jing tơdrong kăl hlŏh lơ̆m tơ iung pơjing kơ jă tơmam drăm OCOP. Ƀô̆h hơdăh tơdrong au, Dơnŏ anĭh vei lăng Mơdro sa dêh char tŏk bŏk pơtrŭh ăn Dơnŏ anĭh vei lăng kon pơlei dêh char kĭ tơchơ̆t trong vă jang tơgŭm djru tĕch răt tơmam drăm OCOP. Mư̆h đei kĭ tơchơt tơdrong vă jang au gô tơgŭm ‘lơ̆ng hơ iă vă lơ hơnĭh tĕch mơdro tơmam drăm OCOP đei pơjing. Đơ̆ng nŏh, tơgoăt tech mơdro hăm rim tơring lơ̆m tĕh đak vă tĕch mơdro tơmam drăm OCOP, pơtrŭt kơtang tơmam drăm OCOP atŏk kơtang lơ̆m khei năr kơnh.”

Tơdrong hơdrin hơnhăk tơmam drăm tơring đei drơ̆ng nơ̆r jing tơmam drăm OCOP tŏk bŏk jing jơhngơ̆m pran pơtrut atŏk tơ iung mŭk drăm tơring chŏh jang sa tơ̆ Dak Lăk. Tơdrong mă au jei tŏk bŏk pơjing jơhngơ̆m pran ăn hơyak pran kơtang hlŏh dơ̆ng ăn tơdrong jang tơ iung pơjing tơring tơrang ‘nao kiơ̆ trong kơ jăp ‘lơ̆ng đơ̆ng sơkơ̆t hơdăh hơnĭh dơ̆ng ăn tơmam drăm chŏh jang sa tơring.

Bơngai chĭh: Lương Lý

Tơblơ̆ nơ̆r: Amazưt