VOV4.Bahnar - Tơ̆ dêh char Dak Nông, lăp mĭnh khei ‘năr pă đei ƀô̆h, jĭ klak chrŏh nhŭng châu Phi hlôi ƀô̆h dơ̆ng tơ̆ mĭnh ƀar tơring. Vă tang găn pơrang tơpŏh lang să, khŭl kơdră tơring păng hơnĭh bơ̆ jang găh au tŏk bŏk kơrŭn đĭ jơhngơ̆m jang kiơ̆ trong jang vat tơring, pơlôch hŭt  nhŭng jĭ.

Rup ƀŭ hŭt nhŭng jĭ

Dang ei Dak Nông hlôi đei 4 apŭng ‘nŏh: Tuy Đức, Dak R’Lấp, Dak Glong, Dak Song đei ƀô̆h dơ̆ng pơrang jĭ klak chrŏh nhung châu Phi pơrăm. Lơ̆m au, tơ̆ apŭng Dak Song hlôi ƀô̆h 5 hơnĭh jĭ tơ̆ 5 pơlei găh 3 tơring Dak N'Drung, Dak Hòa păng Thuận Hạnh. Hơnĭh đei jĭ lơ hlŏh đei ƀô̆h tơ̆ ŭnh hnam ƀok Nguyễn Xuân Thủy oei tơ̆ tơring Quảng Khê, apŭng Dak Glong hăm hlŏh 80 tŏ nhŭng hlôi đei 52 tŏ nhŭng lôch. Dơnŏ anĭh jang pơgang vei lăng kon tơrong hlôi iŏk sĕch pham nhŭng pơtrŭh ăn Dơnŏ anĭh jang pơgang vei lăng kon tơrong tơring IV khăm hơlen păng hlôi đei ƀô̆h sơmach jĭ klak chrŏh nhŭng châu Phi. Trŭh dang ei, tơ̆ Dak Nông, khŭl bơ̆ jang hlôi pơgơ̆r pơlôch, ƀŭ hŭt pơ đĭ 160 tŏ nhŭng jĭ hăm trăp vă jê̆ 5.800 kĭ.

Tơblơ̆ nơ̆r: Amazưt