VOV4.Bahnar - ‘Năr 25/5, kơ dră chĕp kơ̆l Anih vei lăng găh chŏh jang sa păng hơ tŏk tơ iung tơ ring tơ rang dêh char Dak Nông tơ băt, anih jang tŏk bŏk tơ lĕch jang lơ trong jang hơ tŏk loi dơ̆ng vei lăng ‘lơ̆ng hơ drĕch ‘long mắc ca lơ̆m dêh char. Kiơ̆ kơ ‘noh, Anih vei lăng găh choh jang sa păng hơ tŏk tơ iung tơ ring tơ rang hơ găt, rim anih jang pơm tơ lĕch, tĕch mơ dro hơ drĕch ‘long mắc ca athei tơ băt hơ dăh tơ drong hơ găt ‘lơ̆ng tơ mơ̆t yua kiơ̆ tơ drong hơ găt. Tơ drong hơ găt ‘lơ̆ng tơ mơ̆t yua hơ drĕch ‘long mắc ca lơ̆m dêh char ư̆h kơ gơ̆h tŏ sĕt hloh tơ drong hơ găt ‘lơ̆ng teh đak. Rim bơ ngai, anih jang athei pơm kiơ̆ tơ păt rim tơ drong hơ găt khôi luơ̆t găh pơm tơ lĕch, tĕch mơ dro ‘long mắc ca. Hơ drol tĕch mơ dro hơ drĕch ‘long mắc ca, rim bơ ngai, anih jang, khŭl jang athei gơ̆ih tơ roi tơ băt truh Anih vei lăng găh chŏh jang sa păng hơ tŏk tơ iung tơ ring tơ rang dêh char Dak Nông rim tơ drong kơ tơ̆ng ang nhen: Anih pơm hla ar, hơ năn tơ ‘ngla anih jang dăh mă bơ ngai tang măt trŏ luơ̆t, kơ sô̆ điên thoăi pơ ma dơ nuh.

Thuem: Tơ blơ̆